Magniy suyaklar salomatligi, asab o‘tkazuvchanligi, qon bosimini tartibga solish, glyukoza darajasini nazorat qilish va boshqa ko‘plab jarayonlar uchun zarur bo‘lgan mineraldir. Magniy organizmga oziq-ovqat bilan kiradi. U sabzavotlar, yong‘oqlar, dukkaklilar, go‘sht, baliq, sut tarkibida bo‘ladi. Ammo ko‘pincha odamlar mineralni Biologik faol qo’shimcha ko‘rinishida sotib olishadi.
Biologik faol qo‘shimchalarni ishlab chiqaruvchilar vositaning stressda foydali ekanligiga ishontirmoqda va xotirjamlik uchun magniy ichishni taklif qilmoqda. Emishki, dori ta’sirchanlikni kamaytirishga va xavotirni yengishga yordam beradi. Lekin hammasi bunchalik oson emas.
Tadqiqotchilar meta-tahlil o‘tkazdilar, ya’ni xavotir paytida magniy qabul qilish bo‘yicha mavjud adabiyotlarni o‘rgandilar. Ma’lum bo‘lishicha, deyarli barcha tajribalarda mineral ishtirokchilarning holatiga ijobiy ta’sir ko‘rsatgan. Ammo barcha ishlarning kamchiliklari bor edi: qayerdadir platsebo nazorati yo‘q edi, qayerdadir tajriba mualliflari zaif tahlil o‘tkazdilar.
Meta-tahlil mualliflari xavotirga tushganda magniyni tavsiya qilish mumkin emas, degan xulosaga kelishdi, chunki uning ijobiy ta’siri haqidagi dalillar ishonchli emas.
Magniy haqiqatan ham xotirjamlikka yordam beradimi yoki yo‘qligini tushunish uchun sifatli tasodifiy nazorat qilinadigan tadqiqotlar kerak. Ya’ni, ishtirokchilar guruhlarga bo‘linadigan tajribalar. Ulardan biri mineral, ikkinchisi esa platsebo oladi.
Shuning uchun hozircha stress va xavotirga qarshi kurashishning isbotlangan usullariga amal qilgan ma’qul:
- Jismoniy mashqlarni bajarish: yugurish, suzish, yurish, yoga sizga dam olishga yordam beradi.
- Tinchlantiruvchi nafas mashqlarini o‘zlashtirish.
- Muvozanatli ovqatlanishga rioya qilish. Kerakli ozuqa moddalarini qo‘shimchalardan emas, aynan ovqatdan olgan ma’qul.
- Ishongan odamingiz bilan o‘z kechinmalaringizni baham ko‘ring.
- Alkogoldan voz kechish yoki hech bo‘lmaganda cheklash.
- Uyqu tartibiga rioya qilish. Katta yoshdagi odamlarning aksariyati kuniga kamida 7 soat uxlashi kerak. Shu bilan birga, bir vaqtning o‘zida yotish va turish yaxshiroqdir. Shuningdek, uxlashdan oldin kofein va smartfondan voz kechish, yotoqxonani tinch va qorong‘i qilish tavsiya etiladi.
Agar yuqoridagi usullar yordam bermasa, xavotir kundalik ishlarga xalaqit bersa, diqqatni jamlashda muammo bo‘lsa, uxlash qiyin bo‘lsa yoki haddan tashqari ko‘p terlashni sezsangiz, shifokorga murojaat qiling.
Biologik faol qo‘shimchalarga esa umuman ishonmagan ma’qul. Ularning ishlab chiqarilishi dori-darmonlar ishlab chiqarish kabi qattiq nazorat qilinmaydi.
Izoh (0)