Xitoyning Xunan provinsiyasiga qarashli Xuayxua shahrida yashovchi o‘smir yigit ota-onasi tomonidan uydan chiqarib yuborildi va moliyaviy ta’minotdan butunlay mahrum qilindi.
Bu holatga uning oliy ta’lim muassasalariga kirish uchun mo‘ljallangan yagona davlat imtihoni — “Gaokao”dan past ball to‘plagani sabab bo‘lgan. Yigit imtihondan 750 balldan 575 ball to‘plagan. Ota-onasi esa bu ko‘rsatkichni yuqori reytingli universitetga kirish uchun yetarli emas, deb hisoblagan.
Syaokay ismli o‘smir ushbu voqeaga qadar ota-onasi bilan birga yashab kelgan. Biroq bir kuni uning oila a’zolari uyning kirish eshigidagi kodni o‘zgartirib, Syaokayni ichkariga kiritmay qo‘ygan. Yigitning ta’kidlashicha, oilasi uni xatolarini tushunishga majbur qilish maqsadida bunday keskin choraga qo‘l urgan.
Syaokay ko‘chada qolganidan so‘ng onasiga qo‘ng‘iroq qilgan. Ammo suhbatda ayol xizmat safarida ekanini ma’lum qilgan va yangi parolni bilmasligini aytgan: “Bizdan yordam kutma. Yuqori sinflarda sen o‘z vazifangni bajarish o‘rniga vaqtni bekorga sovurding. Darslarga jiddiy yondashmading, belgilangan tartib-intizomga amal qilmading. Axir hayotda hech bir jamiyat qoidalarsiz yashamaydi-ku, to‘g‘rimi?” degan onasi. Suhbat yakunida u o‘g‘liga: “Har kim o‘z hayotini alohida davom ettirsin”, deb qat’iy fikr bildirgan.
Foto: Sinxua
Yigit yuzaga kelgan holat bo‘yicha Hunan TV telekanaliga murojaat qilib, jamoatchilik e’tiborini tortdi. Teledastur efirida u ota-onasining bunday keskin choralaridan noroziligini bildirib:
“Men boshqalarning mehribon va tushunadigan ota-onasiga havas qilaman. Ammo mening ota-onam o‘ta qattiqqo‘l odamlar. Ular meni bo‘ysundirish uchun faqat ana shunday choralargagina tayanishadi”, dedi u.
Ota-onasining ta’kidlashicha, ularning noroziligi faqat imtihon natijalari bilan emas, balki o‘g‘lining mobil telefonga ortiqcha berilib ketgani bilan bog‘liq. Syaokay maktabning boshlang‘ich bosqichlarida namunali o‘quvchi bo‘lgan, biroq smartfon olganidan keyin darslarni ko‘p qoldirishga odatlanib qolgan. Ota esa o‘g‘liga shart qo‘ygan: u uyga qaytib, ota-onasining talablariga so‘zsiz bo‘ysunadi yoki mustaqil hayot boshlab, kunini ko‘raveradi.
Mazkur holat Xitoyda ta’limga va farzand tarbiyasiga nisbatan o‘ta qat’iy munosabat mavjudligini ko‘rsatadi.
Izoh (0)