Ba’zida uzoq safarga borishdan bosh tortamiz, chunki bu jarayon qancha asab va kuch talab qilishini oldindan bilamiz. Axir yo‘lga tayyorgarlik ko‘rishning o‘zi bir dard — chamadonga sig‘may qoladigan buyumlar, aeroportdagi noqulay holatlar, mehmonxonada unutib qoldirilgan buyumlar. Ammo xavotirga o‘rin yo‘q. Bu kabi muammolarning oldini olishga yordam beradigan oddiy, ammo foydali usullar bor.
Qurilmaga skotch yoki izolyatsiya lentasi yopishtirish o‘g‘rilarni chalg‘itadi
Agar siz sayohatda qimmatbaho fotoapparat yoki elektronika olib yurgan bo‘lsangiz, ularga skotch yordamida “soxta” yamoq yopishtirib qo‘ying. Bu usul bilan ularni shikastlangan yoki buzilgan qurilma sifatida ko‘rsatish mumkin. Ehtimol, o‘g‘rilar bunday “buzilgan” buyumga qiziqmay, undan voz kechadi.
Sayohatda shlyapaning foydali jihatlari
Birinchidan, u sizni olomon ichida ajratib turadi. Masalan, aeroportda kimdir sizni kutayotgan bo‘lsa, oldindan “Men ko‘k shlyapada bo‘laman” deb aytsangiz, topish oson bo‘ladi. Ikkinchidan, aeroportdagi tekshiruv vaqtida cho‘ntagingizdagi narsalarni vaqtincha shlyapaga solib qo‘yish qulay. Uchinchidan, mehmonxonada soat, zirak kabi mayda buyumlarni aynan shlyapada saqlash mumkin. Nihoyat, uni kafedagi stul yoki plyajdagi dam olish o‘rindig‘iga qo‘yib, o‘sha joy band ekanini bildirishingiz mumkin.
Suyuq bo‘lmagan shampunga hech qanday shikoyat bo‘lmaydi
Hozirda shampun va konditsionerni qattiq shaklda, ya’ni blok ko‘rinishida xarid qilish mumkin. Bunday shaklda ularni butunlay olib o‘tish oson bo‘ladi, ayniqsa, xavfsizlik nazoratidan o‘tishda 100 ml dan ortiq idishlarni qoldirish talab qilinadigan joylarda. Bu ayniqsa, faqat qo‘l yuki bilan uchayotganlar uchun qulay. Bundan tashqari, boshqa afzalliklari ham bor: yo‘lovchi shampunsiz qolmaydi, suyuqlik yo‘l sumkasida sochilib ketmaydi. Shuningdek, suyuq bo‘lmagan shampun uzoq vaqt xizmat qiladi.
Buyumlarni maxsus tartibda joylashtirish ma’qul
Sayohat uchun chamadon tayyorlayotganda, og‘irroq buyumlarni uning pastki qismiga qo‘yish tavsiya etiladi. Shu tariqa ular chamadonning g‘ildiraklari yonida joylashadi va og‘irlik markazini hosil qilib, chamadonning aeroportda yoki ko‘cha bo‘ylab harakatlanishini osonlashtiradi.
Samolyotda qulay dam olish uchun yostiqcha tanlovi
Agar siz yo‘l yostiqchasini shishirish va uni bo‘yningizga osib yurishdan charchagan bo‘lsangiz, uyda oddiy yostiq qopidan foydalaning. Zarurat tug‘ilganda uni yumshoq kiyimlar bilan to‘ldirib, samolyotda yoki kutish zalida bosh ostiga qo‘yishingiz mumkin.
Oddiy tasma yordamida seyfdagi buyumlarni unutmaslik mumkin
Agar mehmonxonada seyfdan foydalansangiz, uning tutqichiga yorqin tasmaning bir uchini bog‘lab qo‘ying, ikkinchi uchini esa hech qachon unutmaydigan buyumingizga, masalan, chamadoningizga bog‘lang. Shunday qilsangiz, xonadan chiqayotganda seyfdagi muhim narsalarni unutmasligingizga ishonch hosil qilasiz.
Sayohatdan oldin qulay poyabzal tanlash maqsadga muvofiq
Buni qanday qilish mumkin? Poyabzal sotib olishdan oldin kichik bir sinov o‘tkazing: poyabzalni ag‘darib, oyoqni uning tagiga qo‘ying. Agar oyoq tagidan tashqariga chiqmasa, demak hammasi joyida. Ana shunday tufli yoki sport krossovkalari uzoq sayohat uchun mos keladi.
Rang-barang paypoqlarni uyda qoldirish ma’qul
Bilamizki, paypoqlar ko‘pincha yo‘qolib, kutilmagan joylarda paydo bo‘ladi. Shuning uchun yo‘lga faqat bitta rangdagi paypoqlarni olib ketish tavsiya etiladi, shunda doim mos juftlikni izlashga to‘g‘ri kelmaydi.
Bayram kunlaridagi reyslar arzonroq bo‘lishi mumkin
Agar siz bolalarning yozgi ta’tiliga bog‘lanmagan bo‘lsangiz yoki bayram kunlarida hamma uyda o‘tirishi shart deb hisoblamasangiz, ko‘pchilik manzilga yetib bo‘lgan sanalarda chipta bron qilib ko‘ring. Masalan, Yangi yil oldidagi reyslar ko‘pincha arzonroq bo‘ladi. Shuningdek, yo‘lovchilar soni ham kamroq bo‘ladi.
Ikki kishi bo‘lib sayohat qilayotganlar uchun ajoyib maslahat
Agar chiptani onlayn bron qilish imkoniyati bo‘lsa, bo‘sh qatorni tanlab, deraza va yo‘l chetidagi o‘rinlarni band qiling. Boshqa yo‘lovchilar o‘rtadagi o‘rinni tanlamasliklari mumkin. Agar samolyot to‘la to‘lmasa, shunday qilib faqat ikkovingiz bir qatorda uchishingiz ehtimoli yuqori bo‘ladi. Agar kimdir kelib qolsa, shunchaki “Men sherigim yonida o‘tirishni xohlayman” deb ayting.
Izoh (0)