Netflix bosh direktori Ted Sarandosning so‘zlariga ko‘ra, sun’iy intellekt (SI) kino sanoatida inqilobiy o‘zgarishlar yaratishi mumkin. U nafaqat ishlab chiqarish xarajatlarini kamaytiradi, balki rejissyor va ijodkorlarga vizual kontentni yanada boy va qiziqarli tarzda namoyish etish imkonini beradi. Sarandos bu haqda The Hollywood Reporter nashriga bergan intervyusida so‘zlab berdi.
Netflix rahbarining ta’kidlashicha, SI texnologiyasi odamlarning o‘rnini egallamaydi, balki ularga ijodiy ish jarayonlarida yordam beradi. Shuningdek, bunday ilg‘or vositalardan foydalanish ijodkorlarga filmlar va seriallarni nafaqat tezroq va arzonroq suratga olish, balki ularning badiiy darajasini ham oshirish imkonini beradi.
Misol sifatida, Sarandos “Eternavt” nomli argentinalik rejissyorlar tomonidan yaratilgan past byudjetli fantastik serialni tilga oldi. Ushbu loyihada sun’iy intellekt texnologiyalari keng qo‘llangan. Jumladan, Buenos Ayresdagi binoning vayron bo‘lishi sahnasi to‘liq generativ SI yordamida yaratilgan. Natijada bu sahna an’anaviy usullarga nisbatan o‘n barobar tezroq tayyorlangan. Sarandos bu yondashuv ijodiy jamoaning samaradorligini oshirib, ularga vaqt va mablag‘ni tejash imkonini berganini ta’kidladi.
“Eternavt” Netflix tarixida generativ SI keng qo‘llangan ilk seriallardan biri sifatida ham qayd etildi. Yaratilgan vizual effektlar tomoshabinlar va mutaxassislar tomonidan iliq kutib olindi, bu esa kelajakda bunday texnologiyalar kengroq qo‘llanishiga yo‘l ochadi.
Netflix rahbarining fikricha, SI vositalari hikoya qilish imkoniyatlarini kengaytirib, rejissyor va ssenariy mualliflari uchun yangi, ilgari imkonsiz bo‘lgan vositalarini taqdim etadi:
“Bu texnologiyalar insonlar ijodini cheklamaydi, aksincha uni yangi bosqichga olib chiqadi. Natijada tomoshabin yanada sifatli mahsulotni tomosha qiladi”, deydi u.
Kino sanoatida SI texnologiyalaridan foydalanish tendensiyasi so‘nggi yillarda sezilarli darajada kuchaygan. Previzualizatsiya (oldindan tasviriy loyihalash), ssenariy tahlili, aktyorlar harakati va mimikasini sun’iy ravishda yaratish, hatto ovozlarni generatsiya qilish kabi jarayonlarda sun’iy intellekt allaqachon amaliyotga tatbiq etila boshlandi. Ayniqsa, kichik byudjetli studiyalar uchun bu vositalar kinoni “katta ekran” darajasiga olib chiqish uchun muhim poydevor bo‘lmoqda.
Izoh (0)