Hech kim uyga bemaza tarvuz yoki qulupnay olib kelishni xohlamaydi. Aldanib qolmaslik uchun maqoladagi oddiy qoidalarga amal qilib ko‘ring. Ular sizga eng yangi va sifatli meva hamda rezavorlarni tanlashda yordam beradi.
Tarvuz tanlashning oddiy, ammo samarali usullari
Tarvuzni urib ko‘rishning foydasi yo‘q — axir hamma ham pishgan va pishmagan tarvuz tovushini farqlay olmaydi. Eng pishgan tarvuzni topish uchun esa ijtimoiy tarmoqlarda mashhur bo‘lgan oddiy usuldan foydalaning. Ikki qalin-yashil chiziq orasiga ikkita barmog‘ingizni tuting. Agar chiziqlar oralig‘i barmoq kengligiga teng bo‘lsa — siz to‘g‘ri tarvuzni topdingiz.
Tarvuzning yerga tegib turgan joyiga ham qarang — bu odatda sariq yoki och jigarrang dog‘ bo‘ladi. Agar bu dog‘ rangi to‘q va tiniq bo‘lsa, demak, tarvuz uzoqroq yetilgan va ehtimol, yanada shirin hamda xushbo‘y bo‘ladi.
Yana bir muhim belgisi po‘stining silliq emas, balki xira (matt) bo‘lishidir. So‘nggi maslahat: tarvuz qanchalik og‘ir bo‘lsa, shunchalik suvli bo‘ladi.
Shaftoli tanlashda “yashil novda” qoidasidan foydalaning
Tashqaridan pishgan ko‘ringan shaftoli aslida bemaza yoki “paxtadek” qurib qolgan bo‘lishi mumkin. Shuning uchun tajribali dehqonlar tavsiya qiladigan oddiy “yashil novda” qoidasiga amal qiling.
Shaftolining novdaga birikkan qismiga — bandining iziga qarang. Agar bu joy yashil rangda bo‘lsa, shaftoli daraxtdan erta uzilgan va hali to‘liq pishmagan bo‘ladi. Aksincha, agar iz to‘q jigarrang (qoramtir) bo‘lsa, bu shaftoli to‘liq yetilgan, shirin va shirali bo‘lishi ehtimoli yuqori.
Golubikani suvga solib ko‘ring
Ijtimoiy tarmoqlarda mashhur bo‘lgan oddiy usul shirin va nordon golubikani ajratishga yordam beradi. Buning uchun rezavorlarni suv to‘ldirilgan idishga soling. Agar mevalar suv yuzasiga chiqsa — ular nordon, agar tubiga cho‘kib ketsa — shirin. Sababi pishgan va shirin mevalarda shakar miqdori yuqori bo‘ladi, bu esa ularning og‘irroq bo‘lishiga olib keladi.
Qulupnayni yomg‘irli havoda xarid qilmang
Yomg‘irli ob-havo qulupnay sifati uchun xavfli. Chunki yupqa po‘sti namlikdan himoyalay olmaydi va natijada rezavor tezda chiriy boshlaydi. Shuning uchun qulupnayni quyoshli va quruq kunda sotib olish tavsiya etiladi. Bu meva yomg‘irda terilmaganiga kafolat bo‘la oladi.
Qulupnayni chindan ham pishganligini bilish uchun uning yashil “shapkasini” ko‘tarib qarang. Agar uning osti to‘q qizil rangda bo‘lsa bu meva shirin bo‘ladi. Shakli va hajmiga esa e’tibor bermasangiz ham bo‘ladi. Kichik qulupnaylar ko‘pincha kattalariga qaraganda shiraliroq bo‘ladi.
Olma tanlashda e’tibor bering
Mutaxassislar olmani xarid qilishdan oldin unga yengilgina barmoq bilan chertishni tavsiya qilishadi. Agar tovushi quruq daraxtga o‘xshagan tarzda chiqsa — demak, olma pishgan bo‘ladi. Agar tovush xira va bo‘g‘iq bo‘lsa, u holda meva, ehtimol, bemaza chiqadi.
Yana bir belgi olmaning og‘irligiga e’tibor bering. Agar u qo‘lingizda og‘irroq tuyulsa, bu suvli va shirali olma bo‘lishidan darak beradi.
Uzumning bandiga qarang
Uzum tanlayotganda faqat donalarini emas, balki novdasini (bandini) ham tekshiring. Agar poya qoramtir yoki jigarrang bo‘lsa, demak, uzum bir necha kun oldin terilgan va ehtimol, unchalik mazali emas.
Eng yaxshi uzumning novdasi yorqin yashil bo‘ladi va bukilganda darrov sinmaydi. Bu uning yangi, shirali va pishganidan dalolat beradi.
Limon va sitrus mevalarni qo‘lda solishtirib ko‘ring
Greypfrut, limon yoki apelsin sotib olayotganda bir nechta mevaning vaznini qo‘lda solishtirib ko‘ring — og‘irrog‘i odatda eng shirin va shirali bo‘ladi.
Bundan tashqari, ular qattiq va bir oz elastik bo‘lishi kerak — xuddi yaxshi puflangan sharchaga o‘xshab. Bu esa mevaning ideal pishganlik darajasini bildiradi.
Mangoni to‘g‘ri tanlash
Mango rangi ko‘proq uning turi haqida ma’lumot beradi, pishgan yoki pishmaganini emas. Pishgan mango biroz qattiq, ammo biroz yumshoq va elastik bo‘ladi — xuddi shaftoli kabi, ozgina bosilsa eziladi. Agar mango toshdek qattiq bo‘lsa, u hali pishmagan, aksincha juda yumshoq bo‘lsa pishib o‘tib ketgan bo‘ladi.
Eng muhimi mangoning hidi hisoblanadi. Ba’zan pishgan mango shirin va yopishqoq suvi bilan ajralib turadi, bu ham uni yaxshi pishganidan dalolat.
Qaysi mevalar terilgandan keyin pishadi, qaysilari esa yo‘q?
Ba’zi mevalarni biroz pishmagan holda xarid qilib, uyda uzoqroq saqlashingiz mumkin. Ammo ba’zilari faqat pishgan holatda olinishi kerak, aks holda ular yomon bo‘lib qoladi.
Terilgandan keyin ham pishib yetiladigan mevalarga o‘rik, shaftoli, nektarin, olxo‘ri, banan, kivi, mango, avokado va nok kiradi.
Olma, uzum, gilos, ananas, tarvuz, qulupnay hamda sitrus mevalar esa terilgandan keyin yana pishmaydi — ularni faqat pishganini xarid qilish kerak.
Izoh (0)