Rim papasi Lev XIV G‘azoga uyushtirilayotgan hujumlarni “varvarlik”ka qiyosladi. Bu haqda The Guardian xabar berdi.
Papa bu fikrlarini sektorda 73 nafar falastinlik gumanitar yordam markazlarida halok bo‘lganidan keyin bayon qilgan. G‘azo SSV 20-iyul kuni qurbonlar turli joylarda, asosan, sektor shimolida halok bo‘lganini ma’lum qilgan. Ta’kidlanishicha, qurbonlarning 67 nafari BMT yordam mashinalarini kutish chog‘ida Isroil harbiylari tomonidan otib o‘ldirilgan.
BMT Jahon oziq-ovqat dasturining ma’lum qilishicha, gumanitar yordam ortilgan 25 ta yuk mashinasi sektorga kirishi bilan olomon tomonidan qurshab olingan. Shundan so‘ng ular o‘qqa tutilgan.
Ash-Shifo shifoxonasi direktori Muhammad Abu Salmiya 20-iyul kuni BMT yuk mashinalaridan yordam olishga uringan 48 kishi halok bo‘lganini va yana 150 kishi yaralanganini bildirgan.
Ushbu xabarlar paydo bo‘lishi bilan Rimdagi yozgi qarorgohida ibodat qilayotgan Papa hodisaga darhol munosabat bildirgan. Xususan, u “vahshiy urushni zudlik bilan tugatishga va mojaroni tinch yo‘l bilan hal qilishga” chaqirgan.
Shuningdek, Rim papasi Isroilning G‘azodagi yagona katolik cherkoviga yaqinda bergan zarbasini ham qoralagan. Hodisada 3 kishi halok bo‘lib, yana 10 kishi jarohatlangan edi. Jarohatlanganlar orasida marhum Rim papasi Fransisk bilan yaqin aloqada bo‘lgan ruhoniy ham bo‘lgan.
“Men xalqaro hamjamiyatni gumanitar huquqni va tinch aholini himoya qilishga chaqiraman. Shuningdek, aholini majburan ko‘chirishga qarshiman”, degan Papa.
Izoh (0)