Parvoz paytida bizga ovqat va ichimliklar taklif qiladigan styuardessalarning o‘zlari ko‘pincha ularni iste’mol qilmaydi. Buning sababi ularning sog‘liqqa ta’siri va xavfsizligi bilan bog‘liq. Quyida styuardessalar samolyotda odatda qanday taomlardan o‘zini tiyishi va bunga nima sabab bo‘lishi haqida ma’lumot beramiz.
Choy va qahva
Bu ichimliklar uchun suv ko‘pincha samolyotdagi maxsus suv idishlaridan olinadi. Bu suv ichish uchun emas, texnik ehtiyojlar uchun mo‘ljallangan bo‘lishi mumkin. Quvurlar qachon tozalangani noma’lum bo‘ladi, shuning uchun styuardessalar bu ichimliklardan voz kechadi va yo‘lovchilarga ham tavsiya etmaydi.
Bundan tashqari, kofein tanani suvsizlantiradi, samolyotdagi quruq havo esa bu holatni yanada kuchaytiradi.
Spirtli ichimliklar
Samolyotda bosim pasayadi va havoda kislorod kamayadi. Shuning uchun oddiy bir bokal vino ham yerda ichilgandek emas, balki kuchliroq ta’sir qiladi. Bunda bosh aylanishi, holsizlik va noqulayliklar yuzaga kelishi mumkin.
Gazaklar
Pishloq, kreker, yong‘oq kabi yengil tamaddilar tarkibida ko‘p tuz va konservant bo‘ladi. Bu moddalar samolyotdagi quruq havoda tanani yanada suvsizlantiradi. Harakatsizlik va yetarli suyuqlik ichilmasligi “sayohatchi qabziyati” — ich qotish muammosini keltirib chiqaradi.
Issiq ovqat
Samolyotdagi oshxona uskunalari ovqatni yaxshi qizdira olmaydi. Ayniqsa go‘shtli taomlar ichidan yaxshi pishmasligi mumkin. Shu bois styuardessalar issiq ovqatdan voz kechadi va parvozdan keyin taomlanishni afzal ko‘rishadi.
Unda samolyotda nima yeyish mumkin?
Ko‘pchilik styuardessalar parvozdan oldin ovqatlanib, samolyotda faqat suv ichishni ma’qul ko‘radi. Agar uchish vaqtida ovqatlanishga to‘g‘ri kelsa, yangi meva va sabzavotlar, yog‘siz oqsil manbalari (masalan, tovuq go‘shti), tuzsiz yong‘oqlar tavsiya qilinadi. Ichimlik sifatida esa kokos suvi yaxshi tanlov, chunki u organizmni suvsizlanishdan himoya qiladi.
Izoh (0)