Ko‘pchiligimiz ochiq deraza bilan uxlashni, toza havo va tabiat tovushlaridan bahra olishni yoqtiramiz. Ma’lum bo‘lishicha, bu oddiy harakat harorat, namlik va shovqin darajasi kabi tashqi omillarga qarab sog‘lig‘imizga ham ijobiy, ham salbiy ta’sir ko‘rsatishi mumkin ekan, deya xabar beradi Tengri Life.
Derazani ochib uxlashning ehtimoliy foydalari
Uyqu sharoitini o‘zgartirishdan oldin, ayniqsa, surunkali kasalliklar mavjud bo‘lsa, albatta, shifokor bilan maslahatlashishni tavsiya etamiz!
Derazani ochib uxlashning asosiy afzalliklaridan biri xonada havoning yaxshi aylanishidir. Ochiq deraza xonada havo aylanishiga yordam beradi, karbonat angidrid darajasini pasaytiradi va yanada toza muhitni ta’minlaydi. Bu uyqu sifatini sezilarli darajada yaxshilashi mumkin, buni 2017-yildagi tadqiqot ham tasdiqlagan. Unda derazani ochib uxlagan ishtirokchilar uyqu sifati yaxshilanganini qayd etishgan.
Tadqiqot muallifi, doktor Asit Mishra ta’kidlashicha, yotoqxonada yomon havo almashinuvi sharoitida biz o‘zimizni turli xil ifloslantiruvchi moddalar ta’siriga duchor qilamiz, bu esa uyqu sifatiga salbiy ta’sir ko‘rsatadi.
Ochiq deraza yotoqxonada qulay haroratni saqlashga yordam beradi, bu esa yaxshi uyquga ko‘maklashadi. Shuni ta’kidlash kerakki, salqinlik uyqu sifatini yaxshilaydi, ammo harorat juda past bo‘lsa, bu noqulaylik keltirib chiqarishi mumkin. Bunday hollarda sovqotmaslik uchun adyollardan foydalanish yoki issiqroq kiyinish maqsadga muvofiq bo‘ladi.
Derazani ochib uxlashning salbiy tomonlari
Ammo derazani ochish har doim ham maqsadga muvofiq emas. Shahar sharoitida ko‘cha shovqini uyquga xalaqit berishi mumkin. Mashinalar, odamlarning gaplari yoki boshqa manbalardan chiqadigan shovqin tinchlikni buzib, dam olishga to‘sqinlik qiladi. Qishloq joylarda esa bu hayvonlarning, ayniqsa, qushlarning tong otishidan ancha oldin sayray boshlashi bilan bog‘liq bo‘lishi mumkin.
Agar tashqarida yomg‘ir yog‘ayotgan yoki kuchli shamol esayotgan bo‘lsa, derazani yopgan ma’qul, chunki bunday sharoitda shamollash yoki harorat o‘zgarishi tufayli noqulaylik paydo bo‘lishi ehtimoli ortadi.
Surunkali nafas yo‘llari kasalliklari, masalan, astma yoki allergik rinit bilan og‘rigan odamlar uchun tunda ochiq turgan derazalar bezovtalik manbayi bo‘lishi mumkin.
Izoh (0)