Smartfon hayotimizning ajralmas qismiga aylangan. Unda deyarli barcha kerakli ma’lumotlar saqlanadi. Ammo eng noqulay paytda xotira to‘lib qolishi ko‘pchilikka tanish holat. Ko‘p hollarda esa surat va videolarni o‘chirishga ko‘nglimiz bo‘lmaydi. Bunday vaziyatlarda xotirani bo‘shatishning ishonchli va xavfsiz usullarini qo‘llashga to‘g‘ri keladi.
Ilovalar va brauzerlarning keshini tozalang
Ilovalar hamda internet brauzerlar vaqt o‘tishi bilan juda ko‘p keraksiz ma’lumotlarni yig‘ib boradi. Ularni tozalash esa telefon tezligini oshiradi va xotirani bo‘shatadi. Eng muhimi bu jarayon telefoningizdagi muhim fayllarga ta’sir qilmaydi.
Takroriy fayllar va yuklab olingan hujjatlarni o‘chirib tashlang
Ba’zida bir xil faylni bir necha bor yuklab olganingizni sezmay qolishingiz mumkin. Bunday dublikatlarni aniqlab, yo‘qotish orqali anchagina bo‘sh joy ochiladi. Buni qurilma sozlamalari orqali oson topish mumkin.
“O‘chirilgan” fayllar papkasini unutmang
Ko‘p fayllar o‘chirildi deb hisoblasak-da, ular telefoningiz “savat” yoki “o‘chirilgan” bo‘limida saqlanib qoladi. Bu yerda telefondan o‘chirilgan fayllar avtomatik ravishda ma’lum muddat saqlanadi, ammo ular xotiradan joy olib turadi. Vaqti-vaqti bilan bu bo‘limni tozalab turing.
Foydalanilmaydigan ilovalardan xalos bo‘ling
Ko‘plab ilovalarni “kerak bo‘lib qolar” deb o‘rnatamiz, lekin ularga deyarli kirmaymiz. Ayniqsa, o‘yinlar yoki sayohat vaqtida yuklab olingan filmlar telefon xotirasida anchagina joy egallaydi.
Avtomatik tozalash funksiyasidan foydalaning
Hech nima sizning ruxsatingizsiz o‘chib ketmaydi. Shunchaki iPhone’dagi “Xotirani boshqarish” yoki Android’dagi “Telefon dispetcheri”ga kiring va dastur keraksiz fayllarni o‘zi yig‘ib beradi. Foydali fayllarni o‘chirib yubormaslik uchun ularni tekshirib chiqing, keyin esa tasdiqlang.
Izoh (0)