Xitoy butun dunyoda koronavirusga qarshi olib borilayotgan kurash vaqtidan unumli foydalanib qolmoqchi va harbiy qudratini mustahkamlagan holda yer yuziga egalik qilishga da’vo qilib, Janubi-Xitoy dengizidagi neft konlariga e’tibor qaratadi. Bu haqda Daily Mail xabar bergan.
Ekspertlarning fikricha, Xitoy munozarali orollar va marjon orollarni egallab, neft va mineral konlarini ishga tushirib, ushbu hududlarda yadro qurollari ishlab chiqarishni yo‘lga qo‘ymoqchi.
Sun’iy yo‘ldoshdan olingan suratlarda mamlakatning pandemiya sharoitida muayyan yerlarda o‘z harbiy bazalarini qurgani ma’lum bo‘lgan: Subi marjon orollari, Beda va Olovli xoch oroliga harbiy infratuzilma, Vudi oroliga aerodrom, raketa uskunlari, qiruvchi samolyotlar va radiolokatsiya tizimlari joylashtirilgan.
Xitoyning ushbu chora-tadbirlariga AQSh prezidenti Donald Tramp tezda munosabat bildirgan va hududga uchta harbiy kema yuborgan. Xitoy mudofaa vaziri Vey Fenxe AQSh bilan mojara kelib chiqadigan bo‘lsa, XXRning raqibga munosib qarshilik ko‘rsatishini ma’lum qilgan.
Avval Xitoyning koronavirus pandemiyasi sharoitida bahsli vaziyatdagi hududlarni egallash yuzasidan harakat boshlagani ma’lum qilingan. Map World servisidagi onlayn-xaritalarda mamlakatga Hindistonning Arunachal-Pradesh shtatining ayrim hududlari kirgani aks etgandi. Bundan tashqari 19-aprelda Spratli arxipelagi va Parasel orollarida (Xitoyda Sisha va Nansha deyiladi) ikkita ma’muriy okrug shakllantirilgan va ular Xaynan provinsiyasidagi Sansha shahriga bo‘ysunadi. Sansha Xitoy hukumati tomonidan 2012-yilda tashkil qilingan va bundan ko‘zlangan maqsad orolni o‘z bo‘ysinuviga olish edi.Janubi-Xitoy dengizidagi orollar XXR, Malayziya, Filippin, Tayvan, Bruney va Vyetnam o‘rtasidagi bahs-munozaralarga sabab bo‘lgan. Ayniqsa, Skarboro marjon oroli va Spratli arxipelagidagi vaziyat ancha chigal, sababi ushbu hududlar neft va gaz zaxirasiga boy. Janubi-Xitoy dengizidan jahonda neft savdosining 40 foiz trafiki o‘tadi va Xitoy import qiladigan neft va gazning 80 foizi olib kelinadi.
Izoh (0)