Buyuk Britaniya Harbiy-dengiz kuchlari tarkibiga kiruvchi Dengiz savdo tashkiloti (UKMTO) Qizil dengizda joylashgan Ras-Iso portidagi kemaga hujum uyushtirilganidan xabar topdi. Bu haqda tashkilot o‘zining Twitter’dagi sahifasi orqali ma’lum qildi.
Ma’lum qilinishicha, holat bo‘yicha tergov o‘tkazilmoqda. Kema qaysi davlat bayrog‘i ostida harakatlangani aytilmagan.
Reuters agentligining yozishicha, Ras-Iso yaqinida kemalar bilan bog‘liq mojaro oxirgi marta 2019-yilda sodir bo‘lgan. O‘shanda xusiylar Saudiya Arabistoniga tegishli bitta hamda Janubiy Koreyaning ikkita kemasini egallab olgandi.
2021-yilning avgust oyida esa Ummon ko‘rfazining BAA qirg‘oqlarida yana bir kema egallab olingan. UKMTO mazkur holatni “kemani potensial o‘g‘irlash” deb baholagan. Sky News manbalari Panama bayrog‘i ostida harakatlangan Asphalt Princess tankeri egallanganini ma’lum qilgandi. Qurollangan shaxslar tez orada kemani tark etgan va ko‘ngilsiz hodisa shu bilan tugagan edi.
Shu kunning o‘zida OAVda BAA qirg‘oqlarida kamida to‘rtta neft tankeri noma’lum sabablarga ko‘ra, boshqaruvni yo‘qotgani haqida yozgandi. Kemalar Gayana, Singapur, Hindiston va Vyetnam bayroqlari ostida harakatlangan.
Avvalroq Eron Aden ko‘rfazi yaqinida neft tankeriga qarshi qaroqchilar hujumining oldini olgani, AQSh BAA yaqinida qo‘lga olingan tankerdagi Eron neftini 110 mln dollarga sotib yuborgani to‘g‘risida xabar berilgandi.
Izoh (0)