“O‘zbekiston – isteʼdodlar zamini” yoshlar harakati shaharchasida 4-iyun kuni Uzbekistan: Land of Talents global promoushn kampaniyasining rasmiy ochilish marosimi bo‘lib o‘tdi.
Katta saʼy-harakatlarni kreativ va media loyihalar orqali birlashtirish
Uzbekistan: Land of Talents global kampaniyasi O‘zbekiston uchun yangi, hozirgi zamon va global jarayonlarga mos brendni shakllantirishni maqsad qilgan. Ushbu kampaniya O‘zbekistonni inson kapitali orqali rivojlantirish siyosatiga uyg‘un holda, bu yo‘nalishda qilinayotgan ishlarning mantiqiy davomi sifatida amalga oshiriladi.
Kreativ yondashuvlar, media va kontentga urg‘u beruvchi kampaniya barcha manfaatdor tomonlarini birlashtirishni ko‘zda tutadi, shuningdek, yirik xususiy bizneslarning ESG (korporativ ijtimoiy masʼuliyat) strategiyalarini amalga tatbiq etish uchun noyob imkoniyat yaratadi.
Kampaniya Toshkent shahar hokimligi tashabbusi bilan hukumat ko‘magida amalga oshirilayotgan yoshlar harakati bilan boshlab berilmoqda. Uzbekistan: Land of Talents kampaniyasini Kapitalbank, Uzum hamda Ucell kabi xususiy sektor gigantlari qo‘llab-quvvatlamoqda. Katta ko‘lamdagi loyihaga strategik hamkor sifatida boshqa yirik kompaniyalar va steykxolderlar faol jalb qilishi rejalashtirilgan. Shuning uchun, 4 iyun kungi ochilish marosimiga ham O‘zbekistonda turli sohalarda faoliyat yuritayotgan ishbilarmonlar va xususiy sektorning muhim o‘yinchilari vakillari taklif etildi.
Media, kreativ sanoat, loyihalar menejmenti hamda O‘zbekiston va xorijda progressiv o‘zbekistonliklar bilan ishlash bo‘yicha to‘plagan ko‘p yillik tajribaga ega jamoa loyiha ijrochisi bo‘ladi. Tadbir davomida 2023 yildan boshlab “Isteʼdodlar jamiyatini qurib” degan shior bilan nashrdan chiqayotgan Uzbekistan‘s Club jurnalining navbatdagi soni taqdimoti ham bo‘lib o‘tdi. Muqovasida “Manchester Siti” himoyachisi Abduqodir Husanov tasvirlangan jurnal doimgidek eng progressiv o‘zbekistonliklarning hikoyalari, fikr-mulohazalarini kreativ yondashuv bilan o‘zida jamlagan.
Jahon tajribasi
Marosimda taʼkidlanganidek, dunyoda turli mamlakatlar o‘zi uchun tayanch yo‘nalishlarni belgilab, ularni o‘zining mamlakat brendiga, global pozitsiyasiga uyg‘unlashtiradi.
Misol uchun:
- Hindiston — “Incredible India” (Aql bovar qilmas Hindiston) Turizm va axborot texnologiyalari mamlakati.
- Ruanda — “Remarkable Rwanda” (Lol qoldiruvchi Ruanda) Tozalik, IT va boshqaruvda afrikancha namuna.
- Estoniya — “e-Estonia” Rakamli davlat, texnologiya markazi.
- Vyetnam — “Make in Vietnam” (Vyetnamda ishlab chiqaring) Eksport mahsulotlari ishlab chiqarishni autsors qilish uchun yangi manzil.
- Gruziya — “Europe Starts Here” (Yevropa shu yerdan boshlanadi) Oson biznes, shaffof boshqaruv.
O‘zbekiston uchun mos, yangi brend
Kampaniya g‘oyasiga ko‘ra, O‘zbekiston uchun esa ana shunday maqom bu – “Isteʼdodlar yetishib chiqadigan mamlakat” degan brend bo‘la oladi. Aynan inson kapitali – isteʼdodli, salohiyatli, mehnatkash va intiluvchan odamlar – O‘zbekistonning aktivi. Dunyoda ko‘plab mamlakatlar demografik inqiroz va aholi soni o‘smasligi bilan bog‘liq muammolarga duch kelmoqda. O‘zbekiston esa aholi soni o‘sishi va taʼlim sohasining rivojlanishi tufayli noyob demografik dividendga ega bo‘lib qolmoqda. Shunday paytda foydali qazilmalar yoki boshqa tarmoqlar emas, aynan aholining intellektual faoliyatiga asoslangan sohalar (IT, biznes, kreativ sanoat, moliya va xizmatlar sektori (tertiary sector) kabilar) iqtisodiyotning drayveriga aylanishi zarur.
Dunyo bo‘ylab o‘zbekistonliklar oddiy ishchilar bo‘lib emas, malakali mutaxassislar sifatida yetishib chiqishi ham kampaniyaning oliy maqsadlaridan biridir. Og‘ir sharoitlarda mehnat qiladigan hamyurtlarimiz O‘zbekistonga yuborayotgan pullar farzandlar kelajagi, ularning taʼlimiga tikilishi uchun ham muvaffaqiyatli bo‘lish, ilm olish, dunyo miqyosiga chiqish kabilar millat orzu-havasiga, millionlab insonlarning idealiga aylanishi juda muhim.
Izoh (0)