Tarixda aktyorlar suratga olish jarayonida premyerani kutmay turib loyihani tark etgan holatlar ham bo‘lgan. Bunga asosan ijodiy kelishmovchiliklar sabab bo‘lgan. Biroq buning ortida nima yashiringan? Rolga mos kelmaslik, janjalkash xatti-harakatlar, ba’zan esa — jinoyatlar. Kino olamidagi eng shov-shuvli ketishlar haqida hikoya qilamiz.
Erik Stolts
“Kelajakka qaytish” filmida Marti Makflay rolini boshqa aktyor ijro etishi mumkin edi, garchi tashqi ko‘rinishlari juda o‘xshash bo‘lsa ham. Dastlab bu rol Erik Stoltsga berilgandi. Aslida, rejissyor Robert Zemekis va prodyuser Stiven Spilbergning birinchi tanlovi Maykl Jey Foks bo‘lgan. Biroq o‘sha paytda Foks “Oilaviy rishtalar” (Family Ties) serialida suratga tushayotgan edi, shuning uchun uni loyiha maydonidan qo‘yib yuborishmagan.
Bir yarim oy o‘tgach, ya’ni filmning uchdan bir qismi suratga olinganidan keyin, Zemekis xatoga yo‘l qo‘yilganini angladi. Stolts juda dramatik edi va Marti obrazining ajralmas jihatlari — yengillik va sho‘xlikdan yiroq edi. Eng muhimi, u kulgili emasdi. U skeytbord uchishni ham eplay olmasdi, bu esa rol uchun muhim edi. Natijada unga muloyimlik bilan rahmat aytishdi, garchi bu o‘zgarish studiyaga bir necha million dollarga tushgan bo‘lsa ham.
So‘ngra esa kutilmagan holat yuz berdi. “Oilaviy rishtalar” serialiga boshqa yulduz Meredit Bakster qaytdi. Maykl Foksga ikki loyiha ustida bir paytning o‘zida ishlashga ruxsat berildi. Stolts filmda faqat bitta epizodda qoldi — Marti kafeda Biffni urib yiqitadigan sahna.
Jeyms Pyurfoy
“Yovuzlik maskani” va “Jon Karter” filmlaridagi rollari bilan tanilgan Jeyms Pyurfoy “V — bu Vendetta” filmida ishtirok eta olmadi. U Buyuk Britaniyadan bo‘lgan anarxist — V roliga tasdiqlangan bo‘lsa-da, atigi olti hafta suratga tushganidan keyin rejissyor Jeyms MakTig hamda Vachovski opa-singillari, ssenaristlar va prodyuserlar u bilan hamkorlikni to‘xtatishga qaror qildi. Ko‘pchilik uning ovoziga norozilik bildirgan. Chunki aktyorning ovozi yetarlicha qo‘rqinchli va hukmron emasligi aytiladi. Ammo Pyurfoy intervyusida buni inkor qilib, ijodiy kelishmovchiliklar sabab ketganini aytdi. Aynan nima uchun kelishmovchilik bo‘lganini ochiqlamadi.
Yangi “V” roli uchun aktyor izlash uzoqqa bormadi. Darhol “Matrix”dan taniqli Jeyms Xyugo Uivingni jalb qilishga muvaffaq bo‘lishdi. U MakTig va Vachovski opa-singillari uchun yaxshi tanish edi. Ko‘plab sahnalarda Uivingdan faqat ovozini almashtirish talab etilgan. Shunday qilib, rasmiy jihatdan Pyurfoy filmni tark etmagan hisoblanadi. Ammo bu uning uchun kichkina tasalli bo‘ldi.
Jeyms Rimar
Rejissyor Jeyms Kemeron “Begona” filmiga tayyorgarlik ko‘rayotganida kapral Xiks rolini o‘ynay oladigan odamni qidirayotgan edi. Prodyuser Uolter Hill o‘zining do‘sti Rimarni nomzodlikka tavsiya qildi va Kemeron uni inobatga oldi. Ammo tasvirga olish boshlanganidan bir hafta o‘tib, uni loyihadan chetlatdi, va buning sababini darhol oshkor qilmadi.
Keyinchalik aktyor taqiqlangan modda saqlashda hibsga olinishi sababli ishdan bo‘shatishganini tan oldi. Bunday holatda loyiha ishtirokidan gap bo‘lishi mumkin emas edi. Uning o‘rniga Maykl Ben rolga tanlandi. Rimar esa bu xatti-harakati bilan o‘z karyerasiga jiddiy zarar yetkazdi va Sigurni Uiver bilan birgalikdagi afsonaviy franshizada ishtirok etish imkoniyatidan mahrum bo‘ldi. Keyinchalik u bunday xatolarni takrorlamadi. Hozir ham tomoshabinlarni ekrandagi rollari bilan xursand qilmoqda. Yaqinda uni “Oppengeymer” filmida ko‘rish mumkin edi.
Richard Gir
Ko‘pchilik Richard Girni ideal kino hamkori sifatida tasvirlashadi. U odobli, muloyim va madaniyatli.
1974-yilda “Flatbush Lordlari” nomli kichik byudjetli drama suratga olish paytida Gollivud tarixidagi eng kulgili mojaro yuz berdi. Yosh va hali tajribasiz Gir va Stallone shahardagi jinoyatchi guruh a’zolari rollariga tanlangan edi. Lekin suratga olish boshlanishidanoq ular o‘rtasida nizolar paydo bo‘ldi. Stallonening so‘zlariga ko‘ra, uning hamkasbi jiddiy tarzda jang sahnalarida urishardi, doimiy ravishda mojaro qo‘zg‘atardi.
Oxirgi sababi xantal bilan bog‘liq hodisa bo‘ldi. Tanaffus vaqtida aktyorlar mashinada ovqatlanishardi. Ovqatni boshlashdan oldin Stallone hamkasbiga ehtiyot bo‘lishini aytdi. Gir esa tovuqni yeya boshladi va Silvestrning shimlarini iflos qildi. Rokki esa sabr qilolmadi va haqiqiy janjal boshlanib ketdi. Shundan so‘ng kimni qoldirish haqida qiyin qaror qabul qilishga to‘g‘ri keldi. Natijada Gir ishdan bo‘shatildi, Chiko rolini esa Perri King olgan edi.
Izoh (0)