So‘nggi yillarda kino dunyosida smartfonlar yordamida suratga olingan filmlar soni ortib bormoqda. Rejissyorlar bu texnologiyadan nafaqat xarajatlarni kamaytirish uchun, balki ijodiy imkoniyatlarni kengaytirish maqsadida ham foydalanmoqda. Quyida aynan telefonda suratga olingan to‘rt kinoasar haqida so‘z yuritamiz.
“28 yil o‘tib”
“28 yil o‘tib” zombi-apokalipsis haqidagi mashhur hikoyaning davomi bo‘lib, Denni Boyl va Aleks Garland tomonidan suratga olingan.
Film faqat uzoq kutilgani bilan emas, balki to‘liq telefonda suratga olingani bilan ajralib turadi. Butun film iPhone 15 Pro yordamida maxsus linzalar bilan tasvirga olingan. Katta sahnalar uchun esa 20 ta qurilma bir vaqtda sinxron qo‘llangan. Smartfonlarning ixchamligi tufayli odatiy kinokameralar ololmaydigan ajoyib rakurslar tasvirga tushirilgan.
“Mandarin”
“Oskar” mukofoti g‘olibi “Anora” filmi bilan tanilgan rejissyor Shon Beyker tajriba qilishdan cho‘chimaydigan ijodkordir. Aynan uning yondashuvi ko‘plarga ilhom manbayi bo‘ldi.
“Mandarin” filmi uchun Beyker uch dona iPhone 5S bilan kifoyalangan. U maxsus keng burchakli linzalar va FiLMIC Pro ilovasidan foydalangan.
Qizig‘i shunda ediki, film ilk bor “Sandens” festivalida namoyish etilganida, hech kim u telefonda suratga olinganini sezmagan. Tomoshabinlar va tanqidchilar hayratda qolgan. Keyinchalik bu haqiqat oshkor bo‘lgach, “Mandarin” filmi hitga aylangan.
“Telba”
Yana bir tajribalarni sevuvchi rejissyor Stiven Soderberg 2018-yilda 4K formatda iPhone 7 bilan suratga olingan psixologik triller — “Telba” (Unsane)ni taqdim etdi.
Film syujetiga ko‘ra, bosh qahramon Soyer Valentini ta’qib qilayotgan odamdan yashirinmoqchi bo‘lib, adashib ruhiy kasalxonaga yotqiziladi. U yerda unga o‘xshagan boshqa bemorlar sug‘urta firibgarligi uchun ushlab turilayotganini anglaydi. Biroq eng qo‘rqinchlisi — u o‘zini ta’qib qilgan odamning shifokor ekanini ko‘rib qoladi. So‘ng u boshqa bir bemor bilan qochishga urinadi, ammo Soyerning o‘zi ham o‘zining ruhiy holatidan shubhalana boshlaydi.
Film atigi 10 kun ichida suratga olingan. Bosh rollarda “Taxt” serialidan taniqli Kler Foy va Joshua Leonard ishtirok etgan.
“Shakar odamni izlab”
Bu film 1970-yillarda yashab o‘tgan folk va rok xonanda Siksto Rodriges haqida. AQSHda tan olinmagan bo‘lsa-da, u Janubiy Afrikada mashhur shaxsga aylangan. Biroq o‘sha davr siyosati va internetning yo‘qligi sababli xonanda haqida deyarli hech kim hech nima bilmagan. Hattoki u sahnada o‘zini yoqib yuborgan, degan mish-mishlar tarqalgan.
Rejissyor Malik Benjelloul dastlab 8 mm li klassik kinoplyonkani tanlagan, biroq byudjet yetmay qolgan. Material tugagach, u iPhone’ga 8mm Vintage Camera ilovasini o‘rnatib, filmga o‘xshash effektlar yaratishga erishgan. Natijada bu kartina kinosevarlar va musiqa ixlosmandlari orasida haqiqiy fenomenga aylangan. 2013-yilda esa eng yaxshi hujjatli film yo‘nalishida “Oskar” mukofotini qo‘lga kiritgan.
Izoh (0)