Suratga olish jarayonida jarohat olishdan hech kim sug‘urtalanmagan va buni yulduzlar juda yaxshi tushunadi. Ularning ayrimlari hatto kaskadyorlar xizmatidan voz kechib, ongli ravishda xavfga kirishgan. Ushbu maqolada eng dadil va jasur aktyorlar haqida bilib olasiz.
Leonardo DiKaprio
Ko‘pchilik Kventin Tarantinoning “Ozod qilingan Jango” vesternidagi lavhani eslaydi, unda Leonardo DiKaprioning qahramoni g‘azab bilan qo‘lini stolga uradi va shisha stakanni sindirib qo‘lini jarohatlaydi. Ammo ko‘pchilik bu improvizatsiya bo‘lganini bilmaydi. DiKaprio tasodifan jarohat olgan, lekin qon ketayotganiga qaramay o‘ynashni davom ettirgan. Natijada Kelvin Kendi obrazini juda shafqatsiz inson sifatida ko‘rsatgan bu yorqin epizod yakuniy montajga kiritilgan va aktyorning kasbiga sadoqatini namoyon qilgan.
Silvestr Stallone
Avvallari Slay kaskadyorlar yordamisiz tryuklar bajarishi bilan mashhur edi. Biroq bunday fidoyilik ko‘pincha jiddiy oqibatlarga olib keladi. “Yengilmaslar” filmini suratga olayotganda, Stiv Ostin obrazidagi qahramon bilan jang sahnasida Silvestr Stallone yelkasini chiqargan va bo‘yin umurtqasini sindirib olgan. Aktyor bir nechta operatsiyalarni boshdan kechirgan, hattoki metall plastinka o‘rnatishga to‘g‘ri kelgan. Ushbu voqeadan keyin Stallone hamkasblarini kaskadyorlardan butunlay voz kechmaslikka chaqirgan.
Daniel Kreyg
Jeyms Bond roli britaniyalik aktyordan nafaqat aktyorlik mahoratini, balki jismoniy chidamlilikni ham talab qilgan. “Kazino Royal” filmida ishlash jarayonida uning ikkita old tishi singan. Ammo Daniel Kreyg uchun haqiqiy sinov “Tasalli kvanti” filmini suratga olish vaqtida bo‘lgan. U mushak yorilishi, bir nechta qovurg‘a sinishi va yuziga sakkizta chok qo‘yilishi kerak bo‘lgan jarohatlarni olgan.
Bir safar Kreyg hattoki barmog‘ining bir qismini kesib olgan, buning oqibatida uni zudlik bilan kasalxonaga yotqizishga to‘g‘ri kelgan. “007: SPEKTR” filmi ustida ishlayotganida esa tizzasini chiqarib olgan, bu esa suratga olishni kechiktirishga majbur qilgan.
Margaret Kuolli
Mashhur “Substansiya” badiiy filmida o‘ynagan yosh yulduz jiddiy muammolarga duch kelgan. Har kuni yuziga murakkab grim qilishga to‘g‘ri kelgan, bu esa Margaret Kuollida akne (yuz terisining yallig‘lanishi) paydo bo‘lishiga olib kelgan. Uning yuzi shunchalik yallig‘langanki, final sahnalarida rejissyor Kuollini faqat ma’lum burchak ostidan suratga olishga majbur bo‘lgan. Aktrisaning yuz terisi yaxshilanishiga bir yil ketgan. Qizig‘i shundaki, keyingi “Mehr turlari” filmida Margaret obrazidagi qahramon ham akne bilan qiynaladi. Kuolli hazil bilan bu safar grim kerak bo‘lmaganini aytgan.
Chenning Tatum
“Bo‘rilar ovchisi” sport dramasini suratga olayotganda Chenning Tatum o‘z obraziga shunchalik kirib ketganki, bir sahnada boshini butun kuchi bilan oynaga urgan. Jarohat olgan Tatum tezda kasalxonaga yotqizilgan, ammo kadr filmga kiritilgan.
Yana bir hodisa “To‘qqizinchi legion burguti” filmini suratga olayotganda sodir bo‘lgan. Qahramonlar muzli daryoga sho‘ng‘ish sahnasida yordamchilar aktyorlar kostyumiga issiq suv quyayotgan bo‘lishgan. Ulardan biri tasodifan Tatumga qaynagan suv quyib yuborgan — aktyor kuchli kuyish olgan va zudlik bilan kasalxonaga yuborilgan. Chenning bu voqeani keyin hazil bilan eslab bergan.
Uma Turman
“Kill Bill” jangari filmida Turman kabrioletni boshqarishi kerak bo‘lgan, biroq u mashinani xavfli deb o‘ylagan. Rejissyor avtomobil texnik jihatdan soz ekanini ta’kidlab, uni ishontirgan va aktrisa rozi bo‘lgan. Ssenariy bo‘yicha u qumli yo‘ldan haydashi kerak edi, shunda uning sochlari shamolda hilpirashi mumkin edi. Ma’lum bir vaqtda Uma mashinani boshqara olmay qolgan va avtomobil daraxtga urilgan. Avariya natijasida Turman bosh miya chayqalishi, bo‘yin va oyoq jarohatlari olgan. Tarantino ushbu sahnani suratga olishga majbur qilganidan chuqur afsuslangan, ammo ularning munosabatlari yomonlashgan.
Tom Kruz
Mashhur Gollivud aktyori Tom Kruz ko‘p marta suratga olish maydonida o‘zini xavf ostiga qo‘ygan. “Imkonsiz missiya: oqibatlar” filmini suratga olayotganda u bir binodan boshqasiga sakrayotganda devorga urilib, tovon suyagini sindirib olgan. Jarohatga qaramay, Kruz o‘z tryukini yakunlagan, ammo voqea studiyaga juda qimmatga tushgan.
Suratga olish ikki oyga kechiktirilgan.
Nikol Kidman
“Qizil tegirmon” musiqiy filmidagi suratga olish ishlari Nikol Kidman uchun og‘ir sinov bo‘ldi. Raqs sahnalaridan birida aktrisa muvozanatni yo‘qotgan va uni ushlashga uringan Yuen MakGregor buni uddalay olmagan. Kidman esa qovurg‘asini sindirib olgan. Keyinchalik, kostyumni kiyib ko‘rish vaqtida qattiq bog‘langan korset sabab qovurg‘a yana singan. Bundan tashqari, navbatdagi raqs sahnasining repetitsiyasi vaqtida Kidman yiqilib, tizzasini jarohatlagan.
Viggo Mortensen
“Uzuklar hukmdori” epik filmini suratga olayotganda Arogorn obrazidagi aktyor Viggo Mortensen eng ko‘p jarohat olgan aktyorlardan biri bo‘lgan. U qahramon orkning dubulg‘asini kuch bilan tepgan, so‘ngra ikki oyoq barmog‘ini sindirib olgan va og‘riqdan baqirgan. Bu sahna kinoga dramatizm qo‘shgan va rejissyor Piter Jekson dublyajni filmda qoldirishga qaror qilgan. Yana bir jang sahnasida Viggo tishini sindirib olgan, ammo aktyor uni vaqtincha yopishtirib, suratga olishni davom ettirishni xohlagan.
Xolli Berri
“Mushuk ayol” va “X-Odamlar” filmlaridagi rollari bilan mashhur bo‘lgan Xolli Berri ham xavfli sahnalardan cho‘chimaydi. Suratga olishlar uchun aktrisa jiu-jitsu, boks, kikboksing va taekvondoni o‘rgangan, shuningdek, o‘qotar qurol bilan ishlashni ham o‘zlashtirgan. Ammo bunday tayyorgarliklarga qaramay, jarohatlardan qutula olmagan. Berri qo‘l, dumg‘aza, ikkita oyoq barmog‘i, qo‘lning o‘rta barmog‘i va bir necha qovurg‘asini sindirib olgan. “Zarba” dramasini suratga olayotganda aktrisa qovurg‘asini sindirib olgan, lekin suratga olishni to‘xtatmagan va og‘riqqa chidagan.
Izoh (0)