Ijtimoiy tarmoqlarda Jizzaxda 8 nafar qiz “Er kerak” yozuvi tushirilgan plakatni ko‘tarib yurgan videosi tarqalgan edi. Holat yuzasidan sud ishi ko‘rib chiqildi.
Ma’lum qilinishicha, salon rahbari hamda bloger huquqbuzar, deb topilgan. Har ikkala huquqbuzarga nisbatan eng kam ish haqining 15 baravari miqdorida jarima tayinlangan.
Mazkur holat yuzasidan viloyat hokimi o‘rinbosari — Oila va xotin-qizlar boshqarmasi boshlig‘i borib holatni o‘rgangan edi. Jizzax shahar hududidagi dehqon bozori ro‘parasida 8 nafar qiz salonda oq kelinlik ko‘ylagini kiyib olgan holda qo‘llariga “Er kerak” deb yozilgan plakatlarni ushlab, ko‘chada yurgan.
Tasvirlar salonni reklama qilish maqsadida salon rahbari hamda ijtimoiy tarmoq foydalanuvchisi (bloger) Sh.E.lar tomonidan tashkil etilgani, ular reklama videoroligi tayyorlamoqchi bo‘lgani aniqlangan edi.
Holat yuzasidan, Oila va xotin-qizlar boshqarmasi boshlig‘i darhol jarayonni to‘xtatib, qizlarga va go‘zallik saloni rahbariyatiga jamiyatda yurish-turish qoidalariga amal qilishi, milliy qadriyatlarni hurmat qilishi yuzasidan tushuntirish ishlari olib borilgan.
Shu kabi holat Namanganda ham kuzatilgan edi. Davlatobod tumani “Navbahor” mahallasida yashovchi, 2007-yilda tug‘ilgan voyaga yetmagan qiz videosi go‘zallik saloni xodimlari tomonidan salon mijozlari va kanalidagi obunachilar sonini ko‘paytirish maqsadida olingan.
Izoh (0)