“Davlat jilovining bir ipi qo‘limda, deb xohlagan ishni qilish kerak emas” — Davron Kabulov “Raygaz” bilan sudlashgani haqida (video)

“Million” jamoasi sardori Davron Kabulov YouTube’dagi “Daryo” Lifestyle kanaliga bergan intervyusida mehmonxona biznesi bo‘yicha sudlashgani, qaysi sohadan ko‘proq daromad olishi va afsonaviy “Sitora” guruhining yakkaxon konsert dasturi haqida gapirdi.

— O‘tgan yili avgust oyida shaxsiy mehmonxonamiz ishga tushdi. Ikki yarim oy ishlagandan keyin Yakkasaroy gaz taʼminoti prokuratura huzuridagi iqtisodiy jinoyatlarga qarshi kurashish departamenti bilan birga kelib, mehmonxonani nishonga olishdi. Ikki yillik davr uchun 387 million so‘m jarima qo‘llashdi. Undan keyin ham olti oyga yaqin vaqt o‘tdi, ammo hali mehmonxona buncha daromad topgani yo‘q. Menimcha, ular tadbirkorlarni shu tarzda “qo‘llab-quvvatlashyapti”.

Dadam mehmonxonaga gaz taʼminoti ulangandan keyin AQSHga ketdilar. Ammo u paytda hali mehmonxona ishga tushmagan edi. Yaʼni AQSHga ketmasdan avval sertifikat olish, GOST standartidan o‘tkazish kabi ishlarni amalga oshirib, mehmonxona ishga tushgandan keyin tuman gaz taʼminoti bilan shartnoma tuzib, gazni ulash kerak bo‘lgan. Ammo u jarayonda dadam Toshkentda bo‘lmaganlar. Ungacha bo‘lgan davrda mehmonxona ishlamaganini hamma biladi. Gaz taʼminoti esa ularga ariza topshirgan vaqtimizdan to bugungi kungacha bo‘lgan davrda quvurdan qancha gaz o‘tishi mumkin bo‘lsa, o‘shancha mablag‘ni hisoblab berishdi. Bu xuddi qishda ham yozda ham kuniga 24 soat tinimsiz gazdan foydalanilgan, degandek gap. Xullas, “Daryo”ga bergan intervyuda bu haqda aytganimdan keyin “Raygaz”dagilar mendan ranjishibdi.

Qizig‘i, ular otamga bir yil xorijga chiqishi uchun taqiq qo‘yishi va shuncha million jarima solishganiga indamay ketishim kerak ekan. Agar men ularning otasiga bir og‘iz yomon gap gapirib ko‘ray, qanaqa ahvolga tushisharkan. Davlat jilovining bir ipi qo‘limda ekan, deb xohlagan ishini qilish kerak emas, deydi Davron Kabulov.

Suhbat davomida u bir vaqtning o‘zida bir nechta faoliyat turi bilan shug‘ullanishi va qaysi biridan ko‘proq daromad olishi haqida gapirdi.

— Hech bir ish bilan faqat daromad olish uchun shug‘ullanmayman. Agar maqsadim faqat pul topish bo‘lsa, pulni bankka qo‘yib qo‘yishim ham mumkin. Albatta, hech qachon bundan qilmayman. Agar shug‘ullanayotgan ishi insonga zavq bermasa, bir kun kelib undan zerikadi. Mehmonxona biznesi, to‘y xizmatlari, tashkilotchilik, video platforma, ishlab chiqarish — hammasidan zavq olaman.

O‘zbekistondagi eng yaxshi va qimmat boshlovchi bo‘lish uchun umrimning bir qismini sarfladim. Hozir-ku, u daromadimning asosiy manbayi emas. Ammo “To‘y qilsam, Davron Kabulovni aytaman”, deb niyat qilgan insonlar bor. Ularning xohishini “o‘ldirish”ni istamayman. Shu bois vaqtimni taqsimlash va hamma ishga ulgurishga harakat qilaman, deydi Davron Kabulov.

Dekabr oyida afsonaviy “Sitora” guruhining yakkaxon konsert dasturi bo‘lib o‘tadi. Unda AQSHda yashayotgan Feruza Latipova ham ishtirok etadi. Davron Kabulov nega guruhning yakkaxon konsert dasturiga prodyuserlik qilayotgani haqida gapirdi.

— Bir yili “Million”ning konsertiga “Sitora” guruhini taklif etdik. Ularning muxlislari ko‘lami qay darajada ekanligini yaxshi bilaman. O‘ttiz yoshdan oshgan insonlar orasida guruhning muxlislari nihoyatda ko‘p. Ular yoshlik damlarini eslash uchun ham konsertga tashrif buyurishadi, deb o‘ylayman. Men konsertdan daromad olish haqida o‘ylayotganim yo‘q, o‘zim shu ishdan zavqlanyapman. Shu bois uch kunlik konsertlarini o‘tkazishga qaror qildim, deydi Davron Kabulov.

Videoni quyida to‘liq holda tomosha qiling.