Ijtimoiy tarmoqlarda to‘y tadbirida bir qancha avtomashina haydovchilari yo‘l qoidalarini buzib, tomosha ko‘rsatgani aks etgan video tarqaldi. Farg‘ona YHXB holat yuzasidan ma’lumot berdi.
Qayd etilishicha, holat o‘rganilib, to‘yda harakat qoidalarini buzib harakatlangan bir nechta transport vositalari va ularning haydovchilari aniqlandi.
O‘rtog‘imizning to‘yida guruh bo‘lib kortejda yurdik. Qilgan ishimizdan pushaymonmiz, boshqa qaytarilmaydi, deydi yigitlardan biri.
Ushbu holatda ishtirok etgan haydovchilarning ba’zilari harakatlari jinoyat ishlari bo‘yicha Qo‘shtepa tuman sudida ko‘rib chiqildi. Haydovchilar yo‘l bezoriligi sodir etgan, ya’ni mashinalari boshqa mashinalarning harakatiga to‘sqinlik qilib, drift qilgan, o‘z yo‘nalishida harakatlanish yo‘lagini sababsiz uch va undan ortiq marta uzluksiz o‘zgartirgan.
Sud qarori bilan ularga BHMning 5 barobarida jarima va 5 sutka qamoq jazosi tayinlandi.
- Bundan oldin Qoraqalpog‘istondagi to‘yda tanasini mashinadan chiqarib tasvirga olgan operatorlar va haydovchi jarimaga tortilgan edi.
- Shuningdek, Andijonda 20 yoshli qiz mashinadan tanasini chiqarib harakatlangan.
- Samarqandda harakatlanayotgan Gentra’dan tanasini chiqarib, soxta dollar sochgan yigitlarga chora ko‘rilgani to‘g‘risida xabar berilgandi.
Izoh (0)