Samarqand viloyatida Qozog‘iston avtomashinalari ko‘chalar bo‘ylab drift uyushtirgan qozog‘istonliklar xalqdan uzr so‘rab chiqqan edi. “Zamon” dasturda xabar berilishicha, holat yuzasidan sud ishi yakunlandi. 

Ma’lum qilinishicha, Jinoyat ishlari bo‘yicha Samarqand shahar sudida qoidalarni mensimasdan turli qoidabuzarliklar qilgan qozog‘istonlik haydovchi sud qilindi. Sud majlisida u samarqandliklardan kechirim so‘radi, qilmishidan pushaymon ekanini aytdi. 

Sudning yakuniy qarori bilan mehmon — qozog‘istonlik haydovchi Ma’muriy javobgarlik to‘g‘risidagi kodeksning 128-moddasi 1-qismi hamda 129-moddasi 1-qismida nazarda tutilgan huquqbuzarlikni sodir etgan deb topib, 1 yil muddatga transport vositalarini boshqarish huquqidan mahrum qilib, BHMning 25 barobari, ya’ni 9 mln 375 ming so‘m jarima tayinlandi.

O‘zi nima bo‘lgan edi?

Chet ellik avtomashina ishqibozlari Samarqand viloyatida Qozog‘iston avtomashinalari ko‘chalar bo‘ylab drift uyushtirgan. 

“Biz qayerda bo‘lsak ham O‘zbekiston qonunlarini hurmat qilamiz. Ikkinchi marta qaytarilmaydi. Bizga tushuntirishdi. Aslida maxsus maydonda drift qilishimiz kerak edi, lekin shahar ko‘chalarida drift qildik. Samarqand xalqidan kechirim so‘raymiz”, degan qozog‘istonlik haydovchilar.

Shou tashkilotchisining taʼkidlashicha, Qozog‘iston, Tojikiston, Qirg‘izistondan kelgan mehmonlar bilan parad uyushtirilgan bo‘lgan. Lekin ularga drift uyushtirish qonunga zid ekani tushuntirilgan.

Navoiyda poyga o‘ynagan yigitlar avariyaga uchragan edi. Ushbu hodisada tan jarohati olganlar yo‘qligi aytilmoqda. “Sal qolishiga sal qoldi. Bo‘ldi, boshqa poyga o‘ynamayman”, degan edi yigitlardan biri.