O‘zbekiston terma jamoasi 20-mart kuni Jahon chempionati saralashida Qirg‘izistonga qarshi bahs olib borib, 1:0 hisobida g‘alaba qozondi. Uchrashuvning 26-daqiqasida Eldor Shomurodov penaltini aniq amalga oshira olmadi.
Umuman olganda, so‘nggi paytlarda O‘zbekistonning turli yoshdagi jamoalari orasida 11 metrlik jarimadan aniq foydalanish borasida muammo yuzaga kelmoqda. “Daryo” taniqli sharhlovchi Mirzahakim To‘xtamirzayevning bu boradagi fikrlari bilan qiziqdi.
Uning fikricha, o‘sha kuni penaltini Abduqodir Husanov tepishi kerak edi.
Penaltini mashg‘ulot paytida tepish va minglab muxlislar qarshisida tepishning farqi katta. Sababi futbolchi mashg‘ulotda gol ursa yoki ura olmasa, hech narsa o‘zgarmaydi. Lekin o‘yin paytida unda bir marta imkon bo‘ladi. Shu bois jarima zarbasini tepa olamanmi degan ruhiy bosim o‘z ta’sirini o‘tkazadi. Dunyodagi barcha futbolchi penalti tepishda xato qilishi mumkin. Bu futbolning bir qismi. Yaqinda Ronaldu ham Daniya bilan o‘yinda 11 metrlik jarima zarbasidan foydalana olmadi. Lekin biz portugaliyalik futbolchining qanday shug‘ullanishini yaxshi bilamiz. Hozirgi paytda chinakam o‘z ishini ustalari deya baholanayotgan — Mbappe, Vinisius yoki boshqa yulduzlar ham penaltini golga aylantira olmayapti. Mening fikrimcha, o‘sha kuni penaltini Abduqodir Husanovga berish kerak edi. Chunki u “Energetik BGU” safida o‘ynab yurganida jarimadan ham, penaltidan ham gol urishni uddalagan. Agar o‘sha kuni Husanov gol urganda, haqiqiy bayram bo‘lar edi, deydi Mirzahakim To‘xtamirzayev.
Izoh (0)