Jahon sog‘liqni saqlash tashkilotining O‘zbekistondagi vakolatli organi O‘zbekistonda hafta davomida havo haroratining 45 darajagacha ko‘tarilishi bo‘yicha aholining turli yosh qatlamlari uchun tavsiyalar berdi.

Maʼlum qilinishicha, haddan tashqari yuqori havo harorati tez orada o‘lim yoki kasalxonaga yotqizilishga olib kelishi mumkin, shuning uchun issiqlik haqidagi har qanday ogohlantirish zudlik bilan choralar ko‘rish uchun signal bo‘lishi kerak.

Aholi nimalar qilishi lozim? Issiqda qolmaslikka harakat qiling

• Quyosh eng qizigan paytda tashqariga chiqmaslikka harakat qiling. Bu vaqtda jismoniy faollikni cheklang.
• Soyada bo‘ling. Yodingizda bo‘lsin, quyoshda bo‘lganingizda, atrof-muhit harorati 10-15 darajaga yuqoriroq tuyulishi mumkin.
• Agar iloji bo‘lsa, kunning kamida ikki-uch soatini salqin xonada o‘tkazing.
• Cho‘kish xavfini unutmang. Hech qachon suvda yolg‘iz suzmang.
• Rasmiy ob-havo ogohlantirishlarini diqqat bilan kuzating.

Uyni salqin saqlang

• Kechqurun va erta tongda, havo salqinga aylanganda derazalarni oching.
• Kunduzi esa, tashqarida harorat xonaga qaraganda yuqori bo‘lganda, derazalarni, pardalarni yopib, quyosh nurlarining kirishini cheklang.
• Elektr jihozlarini imkon qadar o‘chiring.
• Elektr ventilyatorlardan faqat 40 daraja issiqdan past haroratda foydalaning. 40 daraja issiqdan yuqori haroratda ventilyator tanani yanada qizdiradi.
• Agar konditsioner bilan birgalikda elektr ventilyator ishlatila olsangiz, haroratni 27 darajaga o‘rnating va elektr ventilyatorni yoqing — xonadagi harorat 4 daraja pastroq his qilinadi. Shu yo‘l bilan xonani sovitish uchun sarflanadigan elektr energiyasini 70 foizgacha tejash mumkin.
• Esda tuting, tashqaridagi soya ostida bo‘lish, ichkari xonaga qaraganda salqinroq bo‘lishi mumkin.

Tana qizib ketishi va suvsizlanishidan saqlaning

• Yengil, keng va havo o‘tkazuvchi kiyimlar kiying, “nafas oluvchi” choyshablardan foydalaning.
• Vaqti-vaqti bilan salqin dush qabul qiling yoki vannaga tushib turing.
• Terini nam mato yoki sprey yordamida namlang yoki namlangan yengil kiyim kiying.
• Har soatda kamida bir stakan suv iching, kuniga kamida 2–3 litr.
• 65 yoshdan oshgan keksalar, yurak, o‘pka, buyrak kasalliklari va nogironligi bo‘lgan shaxslar, shuningdek, yolg‘iz tanish va yaqinlaringiz ahvolidan tez-tez xabar olib turing.

Chaqaloqlar va bolalarni himoya qiling

• Qancha vaqtga ketganingizdan qat‘i nazar, bolalar yoki hayvonlarni hech qachon to‘xtab turgan avtomobillarda qoldirmang — ichki harorat xavfli darajaga yetishi mumkin.
• Bolalar imkon qadar soyada yoki salqin joyda bo‘lishi kerak.
• Bolalar aravachasini quruq mato bilan yopmang — bu havoning aylanishiga to‘sqinlik qiladi va issiqlikni ushlab qoladi. Buning o‘rniga ho‘l yupqa mato ishlating yoki portativ ventilyator qo‘llang. 
• Bolaga yengil, keng kiyim kiydiring, boshi soyabonli panama bilan yopilsin. Quyoshdan himoyalovchi krem va ko‘zoynak ham foydali.
• Uyda xavfsiz haroratni saqlash uchun uyda salqinlikni saqlash bo‘yicha tavsiyalarga amal qiling.

Jazirama — haqiqiy xavf. O‘z vaqtida chora ko‘rilmasa, salomatlikka jiddiy zarar yetkazishi mumkin.

Hafta davomida kutilayotgan jazirama issiq

O‘zbekiston hududiga 2—5-iyul kunlari janubdan juda issiq havo oqimlari kirib kelishi kutilmoqda. Prognozlarga ko‘ra, 2-iyul kuni respublika shimolida, janubida va cho‘l hududlarida, 3—5-iyulda hududning katta qismida havo harorati 40-43 darajagacha, janubda va cho‘l hududlarda ba’zi joylarda 44-46 darajagacha ko‘tariladi.

“O‘zgidromet” prognozlariga ko‘ra, 2025-yil yozning o‘rtasi so‘nggi yillarda tez-tez qayd etilganidek, iyul oyi o‘rtacha yillik qiymatlardan 1-2 darajaga iliqroq bo‘lishi kutilmoqda. Ushbu oyda yog‘ingarchilik bo‘lishi ehtimoli kam.

Avvalroq FVV aholiga soat 10:00 dan 17:00 gacha tik tushadigan quyosh nurlari ostida bo‘lmaslikni tavsiya qilgandi.