Prezident qarori bilan Toshkent arxitektura-qurilish universiteti faoliyati yangicha asosda tashkil etiladi. Bu haqda Adliya vazirligi xabar berdi.
2025-yil 1-iyul kuni “Toshkent arxitektura-qurilish universiteti faoliyatida ta’lim tizimi samaradorligini oshirish va ilmiy tadqiqotlarning amaliyot bilan integratsiyasini ta’minlash chora-tadbirlari to‘g‘risida”gi prezident qarori qabul qilindi.
Qarorga muvofiq, 2025/2026-o‘quv yilidan boshlab universitetda o‘qitishning dual ta’lim shakli joriy etiladi. Bu esa nazariy bilimlar va amaliy ko‘nikmalar uyg‘unligida mutaxassislar tayyorlashga xizmat qiladi.
Dual ta’lim dasturi kredit-modul tizimi asosida quyidagicha tashkil etiladi:
1-kurs talabalari uchun – ta’lim dasturlarining 60 foizi auditoriyalarda, 40 foizi esa qurilish sanoati korxonalarida o‘tkaziladi;
2, 3 va 4-kurs talabalari uchun – 40 foiz auditoriyalarda, 60 foiz esa ishlab chiqarish amaliyotida amalga oshiriladi.
Shuningdek, qarorda universitet faoliyatining asosiy samaradorlik ko‘rsatkichlari belgilandi. Jumladan:
ta’lim jarayonlarini ishlab chiqarish bilan yaqinlashtirish orqali amaliy ko‘nikmalarni kuchaytirish;
2028-yil yakunigacha universitet brendini xalqaro darajada shakllantirish va xorijlik talabalarning sonini 1 000 nafarga yetkazish ko‘zda tutilgan.
2023-yil yakuniga ko‘ra, 234 ta professional ta’lim muassasasida 12 735 nafar o‘quvchi dual ta’lim shakli bo‘yicha ta’lim olayotgan edi.
O‘quvchilarning 4 271 nafari kasb-hunar maktablariga, 5 274 nafari kollejlarga hamda 3 190 nafari texnikumlarga to‘g‘ri keladi.
Dual ta’lim shaklini samarali tashkil etish maqsadida 3 603 ta korxona va tashkilotlar bilan hamkorlik o‘rnatilib, o‘quvchilar va korxonalar o‘rtasida 11 325 ta shartnoma imzolangan.
Izoh (0)