Ruminiyaning sobiq prezidenti Ion Iliyeskuga o‘pka saratoni tashxisi qo‘yilgandan so‘ng, u reanimatsiya bo‘limiga yotqizildi. Bu haqda Buxarestdagi Professor doktor Agrippa Ionesku shifoxonasi ma’muriyatining matbuot xizmati o‘zining Facebook sahifasida ma’lum qildi.
Aniqlanishicha, 11-iyun kuni sobiq prezident reanimatsiya bo‘limiga yotqizilgan va unga o‘pka saratoni tashxisi qo‘yilgan. O‘sha kundan beri u shifokorlarning doimiy nazorati ostida reanimatsiya bo‘limida yotibdi.
“Hozirgi paytda bemorning hushi joyida, yurak faoliyati ko‘rsatkichlari me’yorda, mustaqil nafas olmoqda, ammo qo‘shimcha kislorod yordami zarur”, deyiladi xabarda.
Shifoxona ma’muriyat Iliyeskuning ahvoli kasallikning zo‘rayishi, shuningdek, yoshi va boshqa kasalliklar tufayli ancha og‘irlashganini ta’kidlagan. U reanimatsiya bo‘limida davolanishni davom ettirmoqda.
“O‘z-o‘ziga xizmat ko‘rsatish va harakatlanish qobiliyati deyarli butunlay cheklangan”, deya aniqlik kiritdi shifoxona matbuot xizmati.
Ion Iliyesku 95 yoshda bo‘lib, 1990-1996 va 2000-2004-yillarda Ruminiya prezidenti lavozimida ishlagan.
Bundan oldin AQSHning sobiq prezidenti Jo Baydenga ham saratonning agressiv shakli tashxisi qo‘yilgandi. 2025-yil may oyida Oq uyning sobiq rahbari siydik ajratishdagi muammolar tufayli tibbiy ko‘rikdan o‘tgan va unda o‘smalar hamda suyak metastazlari aniqlangan.
Izoh (0)