Ijtimoiy tarmoqlarda Xorazm viloyati Urganch tumanida shoqollar yurgani aytilgan xabarlar tarqaldi. Viloyat Ekologiya boshqarmasi holat yuzasidan munosabat bildirdi.
Unda aytilishicha, ushbu holat Urganch tumani, Chandirqiyot qishlog‘i, “Baqaylar” mahallasi hududida kuzatilgan. Hozirda shoqollarni O‘zbekistonning “Hayvonot dunyosini muhofaza qilish va undan foydalanish to‘g‘risida”gi qonuni talablariga muvofiq muhofaza qilish choralarini ko‘rish hamda inson xo‘jalik faoliyatiga zarar yetkazilishining oldini olish maqsadida havaskor ovchilar guruhi shakllantirilib, hurkitish ishlari olib borilmoqda.
Ma’lumot uchun, hurkitish ishlari — bu bo‘rilar odamlar yashaydigan hududlarga yaqinlashmasligi uchun olib boriladigan profilaktik choralar, ya’ni ularni qo‘rqitish va hududdan yiroqlashtirishga qaratilgan harakatlardir.
Bunday ishlar quyidagilarni o‘z ichiga oladi:
shovqin chiqaruvchi vositalardan foydalanish (masalan, petardalar, tovushli qurilmalar);
olov yoki yorug‘lik vositalaridan foydalanish;
hayvonlarga yoqmaydigan hidli maxsus moddalarni qo‘llash;
aholi yashash punktlari atrofida to‘siqlar, panjaralar yoki elektr to‘rlar o‘rnatish;
bo‘rilar harakatini kuzatib borish va ularning yaqinlashishi aniqlansa, maxsus xizmatlar tomonidan ogohlantirish va zarur choralar ko‘rish.
Bunday choralar ayniqsa qishloq hududlarida, o‘rmonlarga yaqin joylarda yoki qish mavsumida ovqat topa olmay aholi punktlariga tushib qolgan bo‘rilar xavfi oshganida qo‘llaniladi.
Bo‘stonliq tumani Burchmulla davlat o‘rmon xo‘jaligiga qarashli Axsarsoy hududida qo‘ng‘ir ayiq o‘ldirib ketilgani haqida xabar berilgandi. Shuningdek, Surxondaryoda yashaydigan, o‘ta noyob tur bo‘lgan, Xalqaro va O‘zbekiston Qizil kitobiga kiritilgan targ‘il sirtlonning (do‘lta) Sho‘rchi tumanida o‘ldirilgani haqida xabar berilgan edi.
Bundan tashqari, Zomin milliy tabiat bog‘i nazoratchilari tomonidan hududni tunda nazorat qilish chog‘ida yo‘l bo‘yida ayiq yurganining guvohi bo‘lgan va bu holat mobil tasvirga olingan.
Izoh (0)