Erondagi xorijiy diplomatlar, ularning oila a’zolari va boshqa fuqarolar Turkmaniston orqali evakuatsiya qilindi. Bu haqda Turkmaniston Tashqi ishlar vazirligi xabar berdi.
Turkmaniston evakuatsiya uchun o‘z hududini taqdim etgan. Mamlakat Erondan kelayotgan chet el fuqarolariga insonparvarlik yordamini ko‘rsatgan. Turkmaniston chegarasini taxminan 120 nafar fuqaro — Qozog‘iston, Qirg‘iziston, O‘zbekiston, Tojikiston, Ruminiya va boshqa davlatlar vakillari — kesib o‘tgan. Ularga transport vositalari, ovqat, mehmonxona va zarur kundalik ehtiyojlar bilan yordam ko‘rsatilgan.
Gumanitar yordam doirasida Turkmanistonning tegishli davlat idoralari xorijiy davlatlar elchixonalari va xalqaro tashkilotlar bilan yaqin hamkorlikda ishlamoqda, deyiladi xabarda.
Turkmaniston BMT Bosh assambleyasi tomonidan o‘z tashabbusi bilan e’lon qilingan “Xalqaro tinchlik va ishonch” yilida insonparvarlik, xalqaro hamkorlik va yaxshi qo‘shnichilik tamoyillariga sodiq ekanini ta’kidladi.
O‘zbekiston Tashqi ishlar vazirligiga ko‘ra, 30 dan ortiq fuqaro Eron hududidan Turkmaniston va Ozarbayjon orqali muvaffaqiyatli evakuatsiya qilingan.
Mazkur jarayonda yaqindan ko‘mak bergan Turkmaniston, Ozarbayjon va eronlik hamkasblarimizga chuqur minnatdorlik bildiramiz, deydi TIV vakili.
Fuqarolar xavfsizligini ta’minlash uchun barcha zarur choralar ko‘rilmoqda. Eron va Isroildagi elchixonalar 24/7 rejimida faoliyat yuritmoqda. Ayni paytda ushbu davlatlarda bo‘lib turgan o‘zbekistonliklarga xavfsiz joylarda bo‘lish, rasmiy axborotlarni doimiy ravishda kuzatib borish va elchixonalar bilan aloqada bo‘lish tavsiya etiladi.
Izoh (0)