Ruminiyadagi prezidentlik saylovlarining ikkinchi bosqichida Buxarestning liberal-progressiv meri Nikushor Dan g‘alaba qozondi. Natijalar Prezenta.roaep.ro. saytida e’lon qilindi.
U saylovda muxolifatdagi “Ruminlarni birlashtirish uchun alyans” (AUR) partiyasi yetakchisi Jorje Simeonni ortda qoldirdi. Nikushor Dan 6,1 milliondan ortiq (53,60 foiz), Simeon esa 5,3 milliondan ortiq (46,40 foiz) ovoz to‘pladi. Simeon ijtimoiy tarmoqlarda mag‘lubiyatni tan olgan videomurojaatini joylashtirdi, shuningdek, Danni g‘alaba bilan tabrikladi.
Dastlab saylovlar 2024-yilning noyabr va dekabr oylarida bo‘lib o‘tishi kerak edi. Biroq o‘shanda Ruminiya Konstitutsiyaviy sudi rossiyaparast nomzod hisoblangan Kalin Jorjesku g‘alaba qozongan saylovlarning birinchi bosqichi natijalarini bekor qildi va yangi ovoz berishni may oyiga belgiladi.
Yangi ovoz berishning birinchi bosqichi 4-may kuni bo‘lib o‘tdi. Ikkinchi bosqichga Simeon deyarli 41 foiz ovoz va Dan taxminan 21 foiz ovoz bilan o‘tgandi.
Bu Yevropa va Ukraina uchun nimani anglatadi?
Nikushorni allaqachon Ukraina prezidenti Vladimir Zelenskiy g‘alaba bilan tabriklagan.
Ukraina uchun qo‘shni va do‘st sifatida Ruminiya ishonchli hamkor bo‘lishi muhim. Biz ishonamizki, u bo‘ladi. Hamkorlikda biz mamlakatlarimizni ham, Yevropamizni ham kuchliroq qila olamiz, degan Zelenskiy.
Nikushor Dan Ukrainaga yordam berish va Ruminiyaning Yevropa Ittifoqiga chuqur integratsiyalashuvi tarafdori. Ruminiya Ukrainani qo‘llab-quvvatlashda strategik mavqega ega. Keng ko‘lamli urush boshlanganidan keyin mamlakat Ukraina donini eksport qilish uchun asosiy muqobil yo‘nalishga aylandi — Konstansa porti orqali millionlab tonna qishloq xo‘jaligi mahsulotlari o‘tadi. Ruminiya harbiy-dengiz floti Qora dengiz hududini minalardan tozalash operatsiyalarida qatnashib, kemalar qatnovi xavfsizligini ta’minlamoqda.
NATOning uchta yirik harbiy havo bazasi va mamlakat hududida joylashtirilgan AQSHning raketalarga qarshi mudofaa tizimlari Ukraina, Moldova chegaralari hamda Qora dengiz mintaqasi ustidagi havo hududini himoya qilishda muhim rol o‘ynaydi. Shuningdek, Ruminiya hududida Yevropadagi F-16 uchuvchilari tayyorgarlik markazi faoliyat yuritmoqda, bu yerda ukrain harbiylari tayyorgarlikdan o‘tmoqda.
Nikushor Dan Ukrainaga yordam berishda davom etish kerakligini bir necha bor ta’kidlagan: uning so‘zlariga ko‘ra, Kiyevning urushdagi g‘alabasi butun mintaqa manfaatlariga mos keladi.
Nikushor Dan faoliyati
1987 va 1988-yillarda xalqaro matematika olimpiadalarida qatnashib, mutlaq natijalar bilan birinchi o‘rinni egallagan. U Buxarest universitetida matematika yo‘nalishida tahsil olgan.
1992-yilda matematikani chuqurroq o‘rganish uchun Fransiyaga ko‘chib o‘tgan: Parijdagi eng nufuzli oliy o‘quv yurtlaridan biri bo‘lgan Oliy normal maktabda tahsil olib, magistr darajasini olgan. 1998-yilda Parij-Shimol XIII universitetida matematika fanlari doktori darajasini qo‘lga kiritgan.
U Ruminiya Fanlar akademiyasi Matematika instituti tarkibida, Fransiyadagi Oliy normal maktab namunasi asosida tashkil etilgan Școala Normală Superioară București universitetining asoschilaridan biri bo‘lgan va uning birinchi ma’muriy direktori sifatida ishlagan. 2011-yilda matematika professori unvoniga sazovor bo‘lgan. 2020-yilda Ruminiyadagi mahalliy saylovlar natijalarini sarhisob qilgandan so‘ng Buxarestning primari bo‘lgan.
Izoh (0)