Ukraina prezident ofisi rahbarining maslahatchisi Mixail Podolyak Birlashgan Millatlar Tashkiloti bosh kotibi Antoniu Guterrishning don kelishuvi bo‘yicha Kremlga kiritgan “maxfiy taklifi” haqida G‘arb matbuotida tarqalgan ma’lumotlarga munosabat bildirdi.
Podolyakning so‘zlariga ko‘ra, BMT urush targ‘ibotchisi va Rossiyaga keyingi harbiy harakatlarni davom ettirishga imkon bermoqda. Tashkilot qator jiddiy qonunbuzarliklarga qaramasdan, Rossiyaning BMTdagi aʼzoligini to‘xtatib qo‘yishdan bosh tortmoqda.
Podolyak, shuningdek, bosh kotibning Rossiya tashqi ishlar vaziri Sergey Lavrov bilan don kelishuvini qayta tiklash evaziga Rossiyaga qarshi sanksiyalarni keng miqyosda olib tashlash bo‘yicha “yashirin muzokaralari” haqida G‘arb OAVda tarqalgan xabarlarga izoh berdi.
“U ochiqdan ochiq butun dunyoga Rossiya oldida tiz cho‘kishni taklif qilmoqda”, — deb ta’kidladi Podolyak.
Xabarlarga ko‘ra, BMT rahbari Rossiya Qishloq xo‘jaligi bankini SWIFT global moliya tizimiga qaytadan ulashni, sanksiyalarni bekor qilishni, shuningdek, Rossiya mahsulotlari uchun Yevropa mamlakatlari portlarini ochish, Rossiya uchun optimal xavf sug‘urtasini ta’minlash (kema sug‘urtasi), aktivlarni blokdan chiqarish va hokazolarni taklif qilmoqda.
“Bu taklif global dunyo tartibini maksimal kamsitish va haqoratlashdir. Ya’ni u mohiyatan BMTni bekor qiladi. Tashkilot yopilib ketmasa-da, Rossiya tomonida urush targ‘ibotchisi sifatida ishlashda davom etadi”, — dedi Podolyak.
Uning so‘zlariga ko‘ra, Kremlga taklif qilingan “oltin shartlar” Rossiyaga jiddiy bosim o‘tkazishi kerak bo‘lgan ko‘plab kelishuvlarga zid. BMT bosh kotibining taklifi Rossiya uchun barcha “eshiklarni” ochadi.
“Rossiya yana biroz bosim qilish kerakligini tushunmoqda — bir necha o‘nlab, bir necha yuzlab Ukraina fuqarolarini o‘ldiryapti va Guterrishga o‘xshagan odamga bosim o‘tkazyapti. Jahon hamjamiyati Rossiya oldida tiz cho‘kmoqchi. Shunga ko‘ra, biz Rossiyani bu urushdan imkon qadar katta yo‘qotishlarsiz olib chiqmoqchimiz. Shunda u qirg‘inlar, zo‘ravonliklar, bolalarni o‘g‘irlash, xalqaro huquqni buzish va Ukraina bo‘ylab vayron qilingan fuqarolik infratuzilmasi uchun javobgarlikdan qutuladi”, — deb istehzo qildi Podolyak.
Zelenskiy ofisi vakili Rossiya nafaqat don kelishuvidan chiqqani, balki Ukraina infratuzilmasini namoyishkorona yo‘q qilayotganini ta’kidladi. Podolyakning fikricha, Rossiya avvalo jahon bozoridagi raqobatchisini yo‘q qilmoqchi.
“Ikkinchidan, u davlat budjetiga katta daromad keltiruvchi eksportga yo‘naltirilgan asosiy tarmoqlardan biri bo‘lgan sanoatimizni yo‘q qilmoqchi, uchinchidan, Ukrainani o‘rnini bosmoqchi, yaʼni raqobatchisini yo‘q qilib, o‘z mahsuloti bilan chiqmoqchi. To‘rtinchidan, u qishloq xo‘jaligi hududlari — Nikolayev, Xerson, Odessa, Zaporojyeni, transport va logistika infratuzilmasi, portlarni yo‘q qilmoqchi”, — dedi Podolyak.
U Rossiya Qora dengiz ustidan to‘liq nazoratga ega ekani, o‘zi ishtirok etmagan har qanday biznes faoliyatiga to‘sqinlik qilayotganini namoyish etayotganini ta’kidladi.
“Ya’ni, Rossiya nafaqat sanksiyalarni olib tashlashni, balki sanoat bozorini qayta taqsimlashni istaydi. BMTning takliflari ortiga yashiringan holda, shunday qilishda davom etadi”, — deydi maslahatchi.
Shu bilan birga, Podolyakning aytishicha, Ukraina Dunay portlari orqali, Xorvatiya, Ruminiya orqali ishlay olishini va Turkiyagacha kemalarni qo‘riqlab borishini ko‘rsatadi. Qolaversa, Kiyev Qora dengizdagi hukmronlik uchun harbiy-dengiz dronlar yordamida kurashishga qodir.
Bild xabariga ko‘ra, Antoniu Guterrish Lavrov bilan don bo‘yicha kelishuvni qayta tiklash evaziga Rossiyaga qarshi sanksiyalarni keng miqyosda olib tashlash bo‘yicha muzokaralar olib bormoqda.
Izoh (0)