Toshkent shahar, Mirzo Ulug‘bek tumanidagi O‘zbekiston ovozi ko‘chasi tubdan taʼmirlanib, zamonaviy infratuzilma, turizm ko‘chasiga aylantirilmoqda. Bu haqda tuman hokimligi matbuot xizmati xabar berdi.
Maʼlum qilinishicha, qurilish, taʼmirlash ishlarini jadallashtirish maqsadida Sodiq Azimov ko‘chasi va O‘zbekiston ovozi ko‘chalari kesishmasida avtomashinalar harakati 2-iyul soat 12:00 dan 5-iyul soat 8:00 ga qadar cheklanadi.
Qayd etilishicha, Mustaqillik shohko‘chasidan harakatlanganda Maxatma Gandi ko‘chasiga o‘tish va qayrilib olish mumkin. Shuningdek, Maxtumquli ko‘chasidan harakatlanganda Sodiq Azimov ko‘chasining O‘zbekiston ovozi ko‘chasiga tutash qismidan qayrilib olish mumkin.
Taʼmirlash ishlari kun-u tun tashkil etilishi va ikki smenada amaliy ishlar olib borilishi qo‘shimcha qilingan.
Respublika bolalar kutubxonasida “O‘zbekiston ovozi ko‘chasi: Kecha, bugun, ertaga” obodonlashtirish g‘oyasining taqdimoti bo‘lib o‘tgan edi. Rossiyaning Ludi_Architects byurosi me’morlari aholi va shahar ma’muriyati e’tiboriga ko‘chaning “O‘zbekiston” mehmonxonasidan Ekoparkkacha — rekonstruksiya qilish konsepsiyasi, yangi qiyofasini havola qildi. Loyiha “Tashkent Invest” kompaniyasi tashabbusi hamda O‘zbekiston Madaniyati va san’atini rivojlantirish jamg‘armasi boshchiligida yaratilgan.
O‘zbekiston ovozi — Toshkentning markaziy ko‘chalaridan biri. U Mirzo Ulug‘bek tumanida joylashgan va qisman Buyuk ipak yo‘li turar joy mavzesiga kiradi. Uzunligi 750 metr, kengligi 25 metrdan 40 metrgacha, hozirda avtomobil yo‘llari soni 2 ta.
Izoh (0)