“Yoshlar ovozi — Bo‘zatov FEST”: opera yo‘nalishining respublika bosqichi g‘oliblari aniqlandi

3-7-iyun kunlari Toshkentdagi “Yoshlar ijod saroyi”da “Yoshlar ovozi — Bo‘zatov FEST” tanlovining respublika bosqichi bo‘lib o‘tmoqda. “Daryo” muxbiri tadbirning ikkinchi — opera yo‘nalishiga bag‘ishlangan kunida bo‘lib, ishtirokchilar va hakamlar bilan suhbatlashdi.

Ushbu tanlov prezidentning 2020-yil 2-oktyabr kuni Qoraqalpog‘iston Respublikasi Jo‘qorg‘i kengesining navbatdan tashqari sessiyasida bergan topshiriq hamda kengaytirilgan tarzda o‘tkazilgan majlis bayonida belgilangan vazifalar ijrosi asosida tashkil etilgan.

Tanlovning asosiy maqsadi — san’atga, madaniyatga qiziqqan yoshlarni qo‘llab-quvvatlash, ularning iste’dodini yuzaga chiqarishdir. Bu tanlov “Besh tashabbus” doirasida o‘tkazilib, har yili minglab yoshlar ishtirok etmoqda.

Tanlov qanday bosqichlarda o‘tdi?

Bellashuv 5 bosqichda o‘tkazildi:

Mahalla;
Sektor;
Tuman/shahar;
Hududiy;
Respublika bosqichi.

Ishtirokchilar 3 yosh toifasiga ajratilgan:

10—15 yosh
16—22 yosh
23—30 yosh

Yo‘nalishlar esa quyidagicha:

baxshichilik (epik san’at);
an’anaviy ijro;
opera;
estrada.

Respublika bosqichi qanday o‘tmoqda?

Respublika bosqichida hududiy bosqichda saralangan 161 nafar qatnashuvchi o‘z imkoniyatlarini ko‘rsatadi. Har bir yo‘nalishda 42 ta, baxshichilikda esa 35 nafar yosh bellashmoqda. G‘oliblar shu kunning o‘zida e’lon qilib borilyapti.

“Uch yillik mehnatim evaziga respublika bosqichiga yetib keldim”

— Men Ergasheva Shaydo, Namangan viloyatidanman. Opera yo‘nalishida, 10—15 yosh toifasida qatnashyapman. Uch yildan beri bu tanlovda ishtirok etib kelaman, lekin aynan shu yili nasib qilib, respublika bosqichiga chiqdim.

Bugun Tohir Sodiqovning “Bahor” qo‘shig‘ini ijro etdim. Bu qo‘shiqni tanlovda kuylash uchun o‘zim tanlaganman. Ustozim boshida boshqa qo‘shiqni sinab ko‘rishni tavsiya qilgandi, lekin men aynan shu qo‘shiqni aytishni xohladim. Chunki bu qo‘shiq menga juda yoqadi. Akam meni musiqa, san’at olamiga olib kirgan. Yetti yildan beri shu yo‘nalishdaman. Hech qachon boshqa yo‘nalish haqida o‘ylab ko‘rmadim, chunki bu soha menga chin dildan yoqadi.

Hozir esa taqdirlash marosimini kutyapman. Maqsadim — birinchi o‘rinni egallab, 50 million so‘mni qo‘lga kiritish. Kelajakdagi orzularim katta — konservatoriyaga o‘qishga kirish, undan keyin magistraturani ham tugatish niyatim bor, deydi namanganlik qatnashuvchi Shaydo.

“Tanlovga faqat yutish uchun emas, o‘rganish uchun keldim”

— Men Abdurahimova Robiya, Namangandan keldim. 20 yoshdaman, opera yo‘nalishida ishtirok etyapman. Bu yil tanlovda ikkinchi marotaba qatnashishim. Birinchi marta 2024-yilda qatnashgan edim, lekin o‘shanda viloyat bosqichidan o‘tolmaganman. Bu yil esa nasib qilib, respublika bosqichiga yetib keldim.

Bugun hakamlar hay’ati qarshisida “Jazoirlik qiz” operasidan Izabella ariyasini ijro etdim. Hakamlarning fikrlarini xursandchilik bilan qabul qildim. Kamchiliklarim haqida to‘g‘ri aytishdi. Chunki tanqidni o‘sish uchun kerak deb bilaman. Mansur Toshmatov ijromdagi kamchiliklarni ko‘rsatib, yanada o‘z ustimda ishlashimni maslahat berdi. U kishidan o‘rganadiganlarim hali ko‘p. Munojot Yo‘lchiyevaning tilaklari esa menga ruh bag‘ishladi.

Men bu tanlovga faqat yutish uchun emas, o‘rganish, tajriba orttirish, ijodiy o‘sish uchun keldim. Albatta, yuragimda orzu bor — birinchi o‘rin. Lekin bu qarorni hakamlar beradi, dedi Robiya “Daryo”ga bergan intervyusida.

“Robiya va Jasminaning ovozi xalqaro sahnalarga munosib”

“Do‘stlik” ordeni sohibasi, hakam Shirin Mamatova bellashuvchilar haqida o‘z fikrini bildirdi.

— Har yili bu tanlovda yangi, betakror ovozlar kashf etilmoqda. Ko‘plab ishtirokchilar yana qatnashmoqda, raqobat esa juda kuchli, ayniqsa, 16—22 va undan katta yosh toifasida. Lekin eng kichik — 10—15 yoshli ishtirokchilar orasida ham juda iste’dodli bolalar bor. O‘tgan yillardagi g‘oliblar bugun xalqaro tanlovlarda, davlat tadbirlarida ishtirok etmoqda. Bu — biz uchun katta faxr.

Bugungi opera yo‘nalishida ham juda kuchli ishtirokchilarni ko‘rdik. Baholashda biz faqat ovoz emas, balki sahna madaniyati, asar tanlovi, diksiyasi, chet tilidagi matnlarni to‘g‘ri va his bilan ijro etishiga ham e’tibor qilyapmiz. Ayrim ishtirokchilarning ovozi bor, lekin ustoz qo‘lini ko‘rmagani bilinadi — biz ularga maslahatlar berib, ustoz topish, o‘qish lozimligini aytyapmiz.

10—15 yosh toifasida baholash biroz murakkabroq, chunki bu yoshda opera ijrosi og‘ir. Hali ovoz shakllanmagan bo‘ladi. Lekin shunga qaramay, juda tiniq, qo‘ng‘iroqdek ovozli bolalarni ko‘ryapmiz. 16 yoshdan yuqori ishtirokchilarning ko‘pi esa konservatoriya talabasi, professional sahna tajribasiga ega bo‘lgan yoshlar — ularni albatta alohida baholaymiz.

Bugun o‘zim uchun kashf qilgan ishtirokchilar orasida Samarqand viloyatidan kelgan Jasmina ajralib turdi. U Motsartning “Sehrli nay” operasidagi Tungi malika ariyasini ijro etdi — bu juda murakkab asar, lekin Jasmina uddaladi. Shuningdek, namanganlik Robiya ham juda chiroyli ijro qildi — ovozi, sahnada o‘zini tutishi, ko‘rinishi — barchasi bilan yodda qoldi. Bu qizlarning kelajakda nafaqat yurtimizda, balki xorijiy sahnalarda ham porlashi mumkinligiga ishonaman, deydi hakam Shirin Mamatova.

“Baholashda barcha mezonlar muhim”

O‘zbekiston davlat konservatoriyasi professori, san’at fanlari nomzodi Botir Matyoqubov baholash mezoni qanday kechayotgani va tadbirdagi qatnashuvchilar haqida gapirdi:

— “Yoshlar ovozi” tanlovida ishtirokchilar asosan uch yosh toifasida baholanadi. Baholash mezonlari ichida birinchi o‘rinda — ovoz imkoniyati, uning tabiiy tembr va kuchi, texnik ijrosi turadi. Lekin bu yetarli emas. Sahnadagi o‘zini tutishi, kiyinish madaniyati, asarni qanday his qilib, qanday yetkazgani — barchasi muhim.

Biz ishtirokchining ovozini go‘yo zargar qo‘liga tushgan durdek ko‘ramiz. Bu durni sayqallash ustozlarga va albatta, yosh ijrochining o‘ziga bog‘liq. Ayniqsa 10—15 yoshli ishtirokchilarda ovoz o‘zgarish davrida bo‘ladi, bu esa baholashni qiyinlashtiradi. Bunday yoshda mutatsiya jarayoni hisobga olinadi, ularga ovozni zo‘riqtirmaslik, to‘g‘ri shakllantirish bo‘yicha tavsiyalar beriladi.

16—22 va undan yuqori yosh toifasida ishtirokchilar anchayin yetuk, ularning ovozlari shakllangan. Ayrimlari konservatoriya talabasi yoki sahna tajribasiga ega. Bu toifadagilar orasida xalqaro darajada tanilish darajasida kuchli iste’dodlar bor. Misol uchun, baxshichilik yo‘nalishida surxondaryolik Farrux ismli yigit “Temur va Boyazid” dostoni asosida mutlaqo yangi asarni ijro etdi. Bu yosh yigit tanlovda uchinchi marotaba qatnashib, nihoyat birinchi o‘rinni oldi. U umumiy hisobda 110 million so‘m mukofot yutganini faxr bilan aytdi, deydi professor “Daryo”ga bergan intervyusida.

G‘oliblar e’lon qilindi

Tadbir so‘nggida “Yoshlar ovozi — Bo‘zatov FEST” tanlovining opera yo‘nalishi bo‘yicha Respublika bosqichi g‘oliblari e’lon qilindi. 3 ta yosh toifasida o‘tkazilgan bellashuvda eng iqtidorlilar g‘oliblikni qo‘lga kiritdi:

• 10—15 yosh toifasi:

1-o‘rin — Abduraimova Sadoqat (Surxondaryo viloyati)
2-o‘rin — G‘ofirov Yashnarbek (Qashqadaryo viloyati)
3-o‘rin — Mirzaqandov Muhammadmirzo (Farg‘ona viloyati)

• 16—22 yosh toifasi:

1-o‘rin — Asrayeva Jasmina (Samarqand viloyati)
2-o‘rin — Abdurahimova Robiya (Namangan viloyati)
3-o‘rin — Hayitmurodov Elbek (Surxondaryo viloyati)

• 23—30 yosh toifasi:

1-o‘rin — Piyazov Aqilbek (Qoraqalpog‘iston Respublikasi)
2-o‘rin — Muhammadiyeva Madinaxon (Namangan viloyati)
3-o‘rin — Abdumavlonov Ziyodbek (Toshkent viloyati)