Toshkent markazidagi kafe va restoranlarning noqonuniy qo‘shimcha qurilmalari olib tashlanmoqda

Toshkentning “Markaz-1” dahasida joylashgan Sodiq Azimov va O‘zbekiston ovozi ko‘chalaridagi ko‘p qavatli uylarning birinchi qavatida joylashgan umumiy ovqatlanish maskanlari qarshisidagi “naves”lar, terrasalar va noqonuniy qo‘shimcha qurilmalar 27-noyabr kuni olib tashlandi. Qahvaxonalar, fasfud do‘konlar va qishloq xo‘jaligi mahsulotlari bilan savdo qiladigan ko‘chma rastalar olib tashlangan, deb xabar beradi “Gazeta.uz”.

Ta’kidlanishicha, obodonlashtirish xizmati xodimlari ayrim uylarning tashqi tomoni va simyog‘ochlarni bo‘yagan, daraxtlarni butoqlagan. Sodiq Azimov ko‘chasidagi belgilar yangilangan. Hozirda obodonlashtirish ishlari davom etmoqda.

Mirzo Ulug‘bek hokimligi vakillari hududda “tartib o‘rnatilayotgani” va ushbu muassasalarning terrasalar va qo‘shimcha qurilmalarni qurishga haqi bo‘lmaganini bildirgan.

Shuningdek, O‘zbekiston ovozi ko‘chasidagi Respublika bolalar kutubxonasi qarshisidagi go‘sht va oziq-ovqat mahsulotlari bilan savdo qiluvchi ikkita do‘kon, shuningdek, ikkita ko‘chma do‘kon ham hududdan olib tashlangan.

Tuman hokimligi 30-dekabr kuni yuqoridagi ko‘chalarda “tartibsiz qurilgan noqonuniy binolar” buzilayotgani tasvirlangan videorolik bilan bo‘lishgan. Unda qayd etilishicha, gaz va ochiq olovdan foydalanish sabab yuzaga keladigan favqulodda holat atrofdagi binolarga zarar yetkazishi mumkin.

Shuningdek, Shahrisabz ko‘chasidagi “Samimiy maskan. Belle Maman” restoranining peshtaxtasi olib tashlangan. Hokimlik matbuot xizmatining ma’lum qilishicha, ushbu peshtaxta davlat tili to‘g‘risidagi qonun talablarini buzgan.

“Nima sababdan terrasalar va binolar noqonuniy qurilgan bo‘lsa hamda odamlar hayotiga xavf tug‘dirsa, hokimiyat uzoq vaqt bunga e’tibor qaratmay keldi? Nima sababdan tartibga solish ishlari oldingidek to‘satdan amalga oshirilmoqda? Toshkentning aksariyat ko‘chalari kabi tubdan rekonstruksiyaga muhtoj ko‘chalar nima bo‘ladi edi?”, — deya savol bilan murojaat qiladi nashr.

Avvalroq Toshkentdagi tadbirkorlar gaz ta’minoti organi xodimlaridan 1-noyabrdan boshlab gaz uzatilishi o‘chirib qo‘yilishi to‘g‘risida ogohlantirish olayotgani to‘g‘risida xabar berilgandi.