Toshkent shahar hokimligi poytaxt ko‘chalarida pulli to‘xtash joylarini boshqarish huquqi uchun auksion o‘tkazadi. Bu haqda “E-auksion” ma’lumotlarida keltirilgan bo‘lib, birinchilardan bo‘lib Spot e’tibor qaratdi.
Ijaraga beriladigan maydonlarning umumiy hajmi 262,8 ming kvadrat metrni tashkil etadi. Bunda quyidagi ko‘chalar qamrab olinadi:
- Toshkentning markaziy qismi (jumladan, Amir Temur xiyoboni, Movarounnahr, Istiqlol, Yahyo G‘ulomov, O‘zbekiston ovozi, Istiqbol, Sodiq Azimov, Taras Shevchenko, Shahrisabz, Yakkachinor, Shastri, Mahatma Gandi, Hamid Olimjon, Chexov va boshqa ko‘chalar);
- Uchtepa va Chilonzor tumanlari (Kichik halqa avtomobil yo‘li, Farhod, Lutfiy, Cho‘ponota, Muqimiy, Qatortol, Chilonzor, Arnasoy, Yesenin, Beshqayrag‘och ko‘chalari);
- Sergeli va Yangihayot tumanlari (Yangi Sergeli, Tursunzoda, Alaviya, Shokirariq, Islom Sattorov, Qipchoq, Qo‘rg‘ontepa, Birodarlik ko‘chalari);
- Olmazor va Shayxontohur tumanlari (Labzak, Sebzor, Gulobod, Forobiy, Beltepa, Qoraqamish, Qorasaroy, Shimoliy Olmazor ko‘chalari);
- Bektemir tumani (Husayn Boyqaro ko‘chasi);
- Mirobod tumani (Yangi Qo‘yliq ko‘chasi);
- Yashnobod tumani (Ohangaron yo‘li ko‘chasi, Quyi Tolariq, Sivets, Quruvchilar ko‘chalari).
Topografik xaritaga ko‘ra, poytaxtning jami 86 ta hududida pulli to‘xtash joylari tashkil etiladi.
Ijara muddati — 3 yil. Dastlabki 2 yil ichida ijarachi avtoturargohlarni jihozlash, parkomatlar va harakatni tashkil etish vositalarini o‘rnatish, shuningdek, kommunikatsiya va aloqani amalga oshirish uchun kamida 5 million dollar sarmoya kiritishi kerak.
Yillik ijara boshlang‘ich narxi 57,21 milliard so‘mni tashkil etadi. Avtoturargohdan tushgan tushumning kamida 1/12 qismi Toshkent shahar yo‘l-transport infratuzilmasini rivojlantirish jamg‘armasiga o‘tkazilishi kerak. Bundan tashqari, ijarachi avtoturargohlardan maqsadli va qonuniy foydalanish monitoringini ta’minlashi kerak.
Investor parkinglarga transport vositalarini sutkasiga 24 soat mobaynida joylashtirish imkoniyatini, shu jumladan ularda tozalikni saqlash vа obodonlashtirishga doir ishlar bajarilishini taʼminlashi ham lozim.
Auksion 25-noyabr kuni soat 10:00 da bo‘lib o‘tadi, arizalar shu kuni soat 9:00 dan kechiktirmay qabul qilinadi.
Iqtisodchi Otabek Bakirov Toshkentdagi 50 dan ortiq eng gavjum va likvidli ko‘chalar bitta lotda savdoga chiqarilayotganini tanqid qildi.
“Agarda auksion poytaxt ma’muriyati istagandek o‘tsa, shaharda yagona parkovka qiroli paydo bo‘ladi. G‘olibi oldindan yopiq kabinetlarda kelishilmagan bo‘lmasa, bu jarayonni auksion deyishga til bormaydi” deydi iqtisodchi.
Uning ta’kidlashicha, barcha ko‘chalar bitta lotga bog‘langani uchun auksionga kirish shartlari juda og‘ir va qimmat qilingan, qaysidir avvaldan kelishilgan g‘olibga moslashtirilgan bo‘lishi ehtimoli mavjud. 5 million dollarlik investitsiya shartini bajarish va boshlang‘ich narxi 57,2 milliard so‘mlik yillik ijara narxini qabul qilishga jur’at etuvchi o‘nlab raqobatdosh biznes subyektlar topilmasligi aniq. Lekin lotlar 20 ta bo‘lsa, auksionga kirish investitsiyaviy shartlari 100 ming dollardan boshlansa, ishtirokchilar soni keskin ortadi. Auksion ham keskin raqobatli bo‘ladi, ijara haqining narxi auksionda tezroq va ko‘proq oshadi, davlat ham karrasiga yutadi.
Toshkentda pulli to‘xtash joylari
Toshkentda avtomobillar uchun yo‘l bo‘ylarida pulli to‘xtash joylari tashkil etilishi haqida 2021-yilda ma’lum bo‘lgandi. O‘shanda “Toshkent shahar transporti va yo‘l-transport infratuzilmasini 2025-yilgacha rivojlantirish konsepsiyasini tasdiqlash to‘g‘risida”gi Vazirlar Mahkamasi qarori loyihasida poytaxtdagi tirbandliklarni, markaziy ko‘chalarda transport oqimini kamaytirish, avtomobillarning yo‘l bo‘yida betartib to‘xtashini tartibga solish maqsadida yagona avtomobil yo‘l bo‘yi pulli to‘xtash joylari tizimini tashkil etish zarurligi aytilgandi.
Dastlab 10 ta markaziy ko‘chada pulli avtomobil to‘xtash joylari tarmog‘i paydo bo‘lishi e’lon qilindi.
Prezidentning 2022-yil 2-fevraldagi qaroriga muvofiq, 2022-yilda 10 ta markaziy ko‘chalarda, ya’ni Glinka, Bratislava, Mirobod, Avliyo ota, Taras Shevchenko, Said Baraka, Moshtabib, Fidokor, Sodiq Azimov va Yakub Kolas ko‘chalarida davlat-xususiy sheriklik asosida avtomobillarning avtomatlashtirilgan yo‘l bo‘yi pulli to‘xtash joylarini tashkil etish belgilandi.
2024-yil 16-oktyabr kuni Shavkat Umurzoqov Toshkent shahrida transport vositalarining pulli to‘xtab turish faoliyatini yanada takomillashtirish chora-tadbirlari to‘g‘risidagi qarorni imzoladi. Hujjatda pulli to‘xtab turish joylaridan foydalanganlik uchun to‘lovlar miqdori ham tasdiqlandi. Parking hududlari 5 ta tarif zonasiga bo‘linadi.
Bir soatlik to‘xtab turish narxlari:
- 1-tarif zonasida 12 ming so‘m;
- 2-tarif zonasida 10 ming so‘m;
- 3-zonada 8 ming so‘m;
- 4-zonada 6 ming so‘m;
- 5-tarif zonasida 5 ming so‘mni tashkil qiladi.
Parking transport vositalarini saqlash uchun mo‘ljallanmagan. U yerda uchinchi shaxslar tomonidan transport vositalarining olib qochilishi va shikastlanishi xavfi avtomobillar egalari zimmasida qoladi.
2024-yil 19-yanvarda “Yo‘l harakati to‘g‘risida”gi qonun prezident tomonidan imzolangandi. Qonunda pulli to‘xtab turish joylarining egalari ushbu joylardan foydalanganlik uchun to‘lov miqdorini Qoraqalpog‘iston Vazirlar Kengashi, viloyatlar va Toshkent shahar hokimliklari tomonidan Iqtisodiyot va moliya vazirligi bilan kelishilgan holda belgilanadigan cheklangan miqdorlardan yuqori bo‘lmagan tariflar bo‘yicha mustaqil ravishda belgilashi qayd etilgan.
Izoh (0)