So‘nggi yillarda O‘zbekistonda yoshlarning jamiyatdagi o‘rni va davlat boshqaruvidagi ishtiroki sezilarli darajada kengayib, bu borada tizimli ishlar amalga oshirilmoqda. Yoshlarga yangi imkoniyatlar yaratish, ularning tashabbuslarini qo‘llab-quvvatlash maqsadida har yili o‘nlab qonunchilik hujjatlari qabul qilinmoqda.
Davlatimiz rahbari “yoshlarni xalqimizning oltin fondi,” deb ta’kidlab, yoshlar masalasini davlat siyosatining ustuvor yo‘nalishi sifatida belgilab kelmoqda. Bu yondashuv “O‘zbekiston–2030” strategiyasida ham o‘z ifodasini topgan bo‘lib, uning unda belgilangan asosiy vazifalar yoshlar manfaatlariga qaratilgan.
Parlamentda yoshlar masalalari bo‘yicha komissiya va Yoshlar parlamenti orqali yoshlar ovozi davlat qarorlariga yetkazilib, ularning tashabbuslari qo‘llab-quvvatlanmoqda.
O‘zbekiston aholisining 60 foizini yoshlar tashkil etadi. Har yili mehnat bozoriga 600 mingdan ortiq yoshlar qadam qo‘ymoqda va bu raqam 2030 yilda 1 millionga yetishi kutilmoqda. Yoshlar bandligini ta’minlash va tadbirkorlikni rivojlantirish maqsadida amalga oshirilgan islohotlar natijasida so‘nggi 8 yilda yosh tadbirkorlar soni 3 baravar oshdi, ishsiz yoshlar soni esa 2 baravar kamaydi.
Yoshlarni qo‘llab-quvvatlashning samarali mexanizmi sifatida “Yoshlar daftari” orqali 180 mingdan ortiq yoshga 345 milliard so‘mlik yordam ko‘rsatildi. “Yoshlar balansi” asosida yoshlar uchta toifaga – “yaxshi”, “o‘rta” va “og‘ir” toifaga ajratilib, e’tibor markaziga olindi. Ayniqsa, “og‘ir” toifadagi 400 mingga yaqin yoshga davlat tomonidan keng ko‘lamli yordam ko‘rsatildi.
So‘nggi yillarda oliy ta’lim muassasalari soni 3 baravar oshdi va yoshlarning 42 foizi oliy ta’lim bilan qamrab olindi. Xotin-qizlar uchun shartnoma to‘lovlarini davlat qoplab berishi natijasida ularning soni
11 baravar ko‘paydi. Yosh olimlar soni 2 baravar oshib, 4 ming nafardan ortib ketdi. Shuningdek, xorijdagi nufuzli universitetlarda tahsil olayotgan talabalarimiz soni va “El-yurt umidi” orqali xorijda bilim olayotganlar soni ortib bormoqda.
Yoshlar agentligi huzurida 100 million dollarlik jamg‘arma tuzildi. Yosh tadbirkorlarga 2,5 milliard so‘mgacha imtiyozli kreditlar va 2 milliard so‘mgacha startap sarmoyalari yo‘naltirilmoqda. Milliy bank va Aloqabank orqali yoshlar biznesi va startaplari qo‘llab-quvvatlanib, mikroqarzlar va imtiyozli kreditlar ajratib berilyapti.
Kreativ iqtisodiyotda faoliyat yuritayotganlarning 98 foizi yoshlar hisoblanadi. IT sohasida “Bir million dasturchi” loyihasi keng qamrovga ega bo‘lib, yana 300 ming yosh u orqali raqamli ko‘nikmalarga ega bo‘ladi.
Yoshlarda vatanparvarlik tuyg‘usini mustahkamlash maqsadida “Vatan tayanchi” harakati tashkil etilib, unda 1 milliondan ziyod yoshlar qatnashmoqda. Sport orqali tarbiya va sog‘lom turmush tarziga yo‘naltirilgan “Shijoat va g‘ayrat” musobaqalari orqali g‘olib mahallalarda sport infratuzilmalari barpo etilmoqda.
Bugungi kunda davlat tomonidan amalga oshirilayotgan keng qamrovli chora-tadbirlar yoshlarimizning salohiyatini ro‘yobga chiqarish, ularning orzu-intilishlarini qo‘llab-quvvatlash va Yangi O‘zbekiston taraqqiyotiga hissa qo‘shishi uchun mustahkam zamin yaratmoqda. Yoshlarimiz milliy rivojlanishning asosiy harakatlantiruvchi kuchi sifatida mamlakat taraqqiyotida muhim o‘rin egallab bormoqda.
Rajaboyev Dilmurod
Huquqshunos, ekspert
Izoh (0)