“Samarqandim” jurnalining ilk soni nashrdan chiqdi

Samarqand davlat universiteti muassisligida “Samarqandim” nomli ilmiy-siyosiy, ilmiy-ma’rifiy, tarixiy, ommabop jurnal nashrdan chiqdi. Jurnal mundarijasi rang-barang. Unda olis o‘tmish sadolari, kechagi kunlar o‘kinch-armonlari, Vatan qadri, dunyoga yangicha nigohlar ila boqayotgan yangi Samarqand – hamma-hammasi mujassam.

“Insonga ota-onani va Vatanni tanlash imkoniyati berilmagan. Dunyoga kelgan va kindik qonimiz to‘kilgan manzil Vatan hisoblanadi. 

Xuddi ota-onani norizo etib bo‘lmaganidek, Vatanni ham yomonotliq qilishdan saqlanish kerak”...

Yoki “Men Vatani haqida bo‘lar-bo‘lmas gaplar tarqatayotganlarga achinaman. Kimlarnidir nog‘orasiga o‘ynayotganlar ojiz, notavon kimsalardir.

Vatani haqida bir noxush xabarni kstayotganlar, Vatanni muammolarini oshkor qilayotganlar, Vatan haqida turli xil ig‘vo va buhtonlarni bor ovozi bilan aytayotganlardan hazar qilaman.

Vatan bilan vijdon so‘zi yonma-yon qo‘yilishi, birga turishi zarur. Vatan haqida gapirayotganingizda vijdoningizni o‘rtaga qo‘ying. Ajdodlaringizni, avlodlaringizni tavqi la’natga qoldirmang. Bu Vatan kimlarni ko‘rmagan. Kimlar o‘tmagan bu zamindan. Lekin Vatan mangu qolgan... 

Har qanday gunohni kechirsa bo‘ladi. Faqat Vatan  va ota-ona oldida qilingan gunohdan tashqari”...

Yoki Sharofat Yo‘ldoshevaning “Odamiylik ilmi yoki Afrosiyobni kim saqlab qolgan?” maqolasidagi ushbu bitiklarga e’tibor qarating: 

“Samarqanddan noxush xabar keldi. Yahyo G‘ulomov darhol qadim shaharga uchdi. Loyiha bo‘yicha Toshkent – Samarqand yo‘li Afrosiyobning qoq o‘rtasidan o‘tishi ko‘zda tutilib, bu yerda qudratli buldozerlar ishlayotgan edi. 

– Vayrongarchilikni to‘xtating, – akademik traktorlardan birining oldiga ko‘krak kerib chiqadi...

Xuddi shu daqiqalarda Samarqandda katta anjuman tantanalari boshlanayotgan edi.

Yahyo G‘ulomov foyeda respublika rahbarini to‘xtatib murojaat qiladi: 

 – Anjuman tugaguncha Afrosiyobdan asar ham qolmaydi. Agar shunday bo‘lsa, tarix bizni kechirmaydi”... 

Jurnalda qalbni junbushga keltiradigan maqolalar bir talay. 

Loyiha muallifi, Samarqand davlat universiteti rektori, O‘zbekiston Respublikasi fan arbobi, Oliy Majlis Senati a’zosi Rustam Xolmurodov.