Avvalroq “Inter” hujumchisi Lautaro Martines jamoasi bilan birga klublar o‘rtasidagi JCHda “Fluminense”ga mag‘lub bo‘lgach kim jamoada qolishni istamasa, ketishi kerakligini aytgandi. Milanliklar yarim himoyachisi Hoqon Chalxono‘g‘lu Lautaroning ushbu so‘zlariga javob qaytardi.
Turkiyalik futbolchi YCHL finalida olgan jarohatidan keyin ham jamoa bilan AQShga borishi kerak degan qarorga kelganini aytdi.
“O‘ynay olmasam ham, u yerda bo‘lish va yigitlarni qo‘llab-quvvatlash men uchun juda muhim edi. Afsuski, AQShdagi mashg‘ulotlar chog‘ida butunlay boshqa sohada yana jarohat oldim. Tashxis: mushak yorilishi. Jarohatim tufayli ushbu turnir davomida maydonda o‘ynay olmadim. Buning ortida boshqa sabab, boshqa hech narsa yo‘q. Mag‘lubiyatga uchradik va bu og‘riqli”, deydi futbolchi.
Chalxono‘g‘lu nafaqat futbolchi sifatida, balki inson sifatida ham xafa bo‘lganini aytdi.
“O‘yindan so‘ng darhol bir necha jamoadoshlarimga qo‘ng‘iroq qilib, ularning kayfiyatini ko‘tardim. O‘z jamoasiga qayg‘uradiganlar shunday qilishadi. Meni hayratga solgan narsa o‘yindan keyingi so‘zlar edi. Og‘riq keltiradigan so‘zlar. Jamoani birlashtiruvchi emas, ajratuvchi so‘zlar.
Faoliyatim davomida men hech qachon bahona qilmaganman. Har doim mas‘uliyatni o‘z zimmamga olganman. Og‘riqlarga qaramay o‘ynadim va jamoani og‘ir damlarda so‘z bilan emas, balki harakatlar bilan boshqardim”, degan turkiyalik yarim himoyachi.
Hoqon har qanday fikrni, hatto jamoadoshi yoki klub prezidentining fikrini hurmat qilishini aytdi.
“Lekin hurmat bir tomonlama ko‘cha emas. Men hamisha maydonda ham, uning tashqarisida ham hurmat ko‘rsatganman va hayotda bo‘lgani kabi futbolda ham haqiqiy kuch hurmatda ekanligiga ishonaman, ayniqsa, hissiyotlar vaqtida. Men hech qachon bu klubga xiyonat qilmaganman, hech qachon “Inter”dan norozi ekanligimni aytmaganman”, degan Hoqon Chalxono‘g‘lu.
Izoh (0)