“Inter” jamoasi sardori va hujumchisi Lautaro Martines Klublar o‘rtasidagi Jahon chempionatining 1/8 final bosqichida Braziliyaning “Fluminense” klubiga 0:2 hisobida mag‘lub bo‘lib, musobaqani tark etganidan keyin o‘z fikrlarini bildirdi.
Argentinalik hujumchi kim jamoada qolishni istamasa, ketishi kerakligini ta’kidladi:
— Biz bor kuchimizni ishga soldik. Butun jamoamiz nomidan muxlislardan uzr so‘rayman. “Inter” doimo o‘z oldiga katta maqsadlar qo‘yib, ularni amalga oshirish uchun kurashib kelgan. Kim klubda qolishni xohlamasa va belgilangan talablarimizga javob bermasa, ketishi kerak. Bugungi o‘yinimizdan qoniqmadim. Sardor sifatida men jamoaning maqsadlari uchun kurashishni davom ettirmoqchiman. Jamoamiz kuchli, biz sovrinlar yutganmiz va shu yo‘ldan borishni istayman. Kim qolishni istasa, qoladi. Kim istamasa — xayr.
Shuningdek, u mavsum juda og‘ir kechganini aytdi:
— Hech kim bu yo‘lda yolg‘iz harakat qilib, natijaga erisha olmaydi. Sardor sifatida eng katta mas’uliyat mening bo‘ynimda turibdi. Bu mag‘lubiyat uchun muxlislardan kechirim so‘rayman. Mavsum juda uzun va og‘ir kechdi. Endi kuch yig‘ishimiz, jismoniy holatimizni tiklashimiz va “Inter”ni yana katta sovrinlar uchun tayyorlashimiz kerak, — dedi Lautaro Martines.
Eslatib o‘tamiz, “Fluminense” chorak finalda “Al-Hilol” bilan to‘qnash keladi.
Izoh (0)