Аввалроқ “Интер” ҳужумчиси Лаутаро Мартинес жамоаси билан бирга клублар ўртасидаги ЖЧда “Флуминенсе”га мағлуб бўлгач ким жамоада қолишни истамаса, кетиши кераклигини айтганди. Миланликлар ярим ҳимоячиси Ҳоқон Чалхонўғлу Лаутаронинг ушбу сўзларига жавоб қайтарди.
Туркиялик футболчи ЕЧЛ финалида олган жароҳатидан кейин ҳам жамоа билан АҚШга бориши керак деган қарорга келганини айтди.
“Ўйнай олмасам ҳам, у ерда бўлиш ва йигитларни қўллаб-қувватлаш мен учун жуда муҳим эди. Афсуски, АҚШдаги машғулотлар чоғида бутунлай бошқа соҳада яна жароҳат олдим. Ташхис: мушак ёрилиши. Жароҳатим туфайли ушбу турнир давомида майдонда ўйнай олмадим. Бунинг ортида бошқа сабаб, бошқа ҳеч нарса йўқ. Мағлубиятга учрадик ва бу оғриқли”, дейди футболчи.
Чалхонўғлу нафақат футболчи сифатида, балки инсон сифатида ҳам хафа бўлганини айтди.
“Ўйиндан сўнг дарҳол бир неча жамоадошларимга қўнғироқ қилиб, уларнинг кайфиятини кўтардим. Ўз жамоасига қайғурадиганлар шундай қилишади. Мени ҳайратга солган нарса ўйиндан кейинги сўзлар эди. Оғриқ келтирадиган сўзлар. Жамоани бирлаштирувчи эмас, ажратувчи сўзлар.
Фаолиятим давомида мен ҳеч қачон баҳона қилмаганман. Ҳар доим масъулиятни ўз зиммамга олганман. Оғриқларга қарамай ўйнадим ва жамоани оғир дамларда сўз билан эмас, балки ҳаракатлар билан бошқардим”, деган туркиялик ярим ҳимоячи.
Ҳоқон ҳар қандай фикрни, ҳатто жамоадоши ёки клуб президентининг фикрини ҳурмат қилишини айтди.
“Лекин ҳурмат бир томонлама кўча эмас. Мен ҳамиша майдонда ҳам, унинг ташқарисида ҳам ҳурмат кўрсатганман ва ҳаётда бўлгани каби футболда ҳам ҳақиқий куч ҳурматда эканлигига ишонаман, айниқса, ҳиссиётлар вақтида. Мен ҳеч қачон бу клубга хиёнат қилмаганман, ҳеч қачон “Интер”дан норози эканлигимни айтмаганман”, деган Ҳоқон Чалхонўғлу.
Изоҳ (0)