Ukraina prezidenti Vladimir Zelenskiy 25-iyun kuni Strasburgda “Putin uchun tribunal” yaratish bo‘yicha kelishuvni imzoladi. U “Rossiyaning barcha harbiy jinoyatchilari, jumladan, Putin ham” sud oldida javob berishini aytdi. Bu haqda BBC xabar berdi.
Tribunal tashkil etish bo‘yicha kelishuv — hali boshlanishi. Endi hammasi ishlashi uchun real qadamlar qo‘yishimiz kerak. Har bir rossiyalik harbiy jinoyatchi, jumladan Putin ham sud oldida javob berishini ta’minlash uchun kuchli siyosiy hamkorlik kerak, dedi u.
Ukraina prezidenti Rossiya ustidan g‘alaba qozonish uchun kurash to‘xtamasligini qayd etdi.
Ba’zilar tribunal amalda nimaga qodir, faqat qurol-yarog‘, texnologiyalar va dronlarga e’tibor qaratish afzalroq emasmi, deb so‘rashadi. Shubhasiz, Ukrainani harbiy jihatdan qo‘llab-quvvatlash, Rossiyaga nisbatan qat’iy sanksiyalar va siyosiy bosim o‘tkazish nihoyatda muhim.
Aynan shu narsa Rossiyaga urushning haqiqiy qiymatini his qildiradi. Ha, bosqinchi mag‘lub bo‘lishi kerak, biz bunga erishish uchun harakat qilmoqdamiz. Ukrainaliklarning hayoti himoya qilinishi shart. Mudofaamizni qo‘llab-quvvatlayotgan barchaga minnatdorchilik bildiraman, dedi u.
Zelenskiy odil sudlovning ahamiyatiga ham to‘xtaldi. Unga ko‘ra, odil sudlov shunday ishlashi kerakki, harbiy jinoyatchilar Yevropada ham, boshqa hech qayerda ham yashirinish uchun joy topa olmasin.
Odil sudlov shunday ishlashi kerakki, bunday tajovuzkor jinoyatlarni rejalashtirayotganlarning barchasi javobgarlikka tortilishini aniq bilsin. Odil sudlov shunday ishlashi kerakki, tajovuzkorlikning hech qanday ko‘rinishiga yo‘l qo‘yilmaydigan huquqiy tamoyil o‘rnatilsin.
Shuning uchun ham agressiya jinoyati qayd etilishi, qoralanishi va jazolanishi shart. Gaaga buning uchun eng maqbul joy. Gaaga odil sudlovning amalga oshirilishini kutmoqda, deya ta’kidladi prezident.
Izoh (0)