Jahon banki O‘zbekistonga kichik gidroenergetika sohasini rivojlantirish va mamlakat bo‘ylab elektr ta’minoti ishonchliligini oshirishga qaratilgan yangi loyiha uchun 150 million dollar miqdorida imtiyozli kredit ajratishni ma’qulladi.
Bank saytida xabar berilishicha, loyiha xususiy sektor, jumladan, mahalliy kichik gidroelektr stansiyalari ishlab chiquvchilari va banklar ishtirokida amalga oshiriladi.
“2030-yilga borib O‘zbekistonda elektr energiyasiga bo‘lgan talab ikki barobarga oshib, 120 milliard kilovatt soatdan oshishi kutilmoqda. Mamlakatda elektr energiyasi ishlab chiqarishning o‘sishiga qaramay, ehtiyojlarning 10 foizga yaqini qondirilmayapti, bu esa elektr ta’minotida uzilishlarga olib kelmoqda, ayniqsa, energiya bilan kam ta’minlangan hududlar va qishloq joylarda” deyiladi Jahon banki xabarida.
Qayd etilishicha, bunga asosiy sabab energiyani uzatish va taqsimlash bilan bog‘liq muammolardir.
Mavjud sug‘orish kanallari tarmog‘idan foydalanuvchi quvvati 100 kVt dan 5 MVt gacha bo‘lgan kichik gidroelektrostansiyalar energiya bilan kam ta’minlangan hududlarda elektr energiyasi ishlab chiqarishni oshirishga qodir. Ular aholi va xususiy sektorni elektr energiyasi bilan ta’minlash ishonchliligini oshirishda samarali yechim bo‘lib, O‘zbekiston hududlarini rivojlantirishga ham hissa qo‘shishi mumkin.
“O‘zbekiston hukumati 3 mingga yaqin kichik gidroelektrostansiyalar qurilishiga sarmoya kiritishni va 2026-yilgacha ularning o‘rnatilgan quvvatini 160 MVtga yetkazishni rejalashtirmoqda. Bu 280 ming kishini qo‘shimcha elektr energiyasi bilan ta’minlash imkonini beradi”, deydi Jahon bankining Markaziy Osiyo bo‘yicha mintaqaviy direktori Tatyana Proskuryakova.
Xabarda aytilishicha, Jahon banki tomonidan moliyalashtirilayotgan va O‘zbekiston Energetika vazirligi tomonidan 2025—2030-yillarda amalga oshiriladigan yangi loyiha ushbu maqsadga erishishga yordam beradi.
Loyiha 2030-yilga borib umumiy o‘rnatilgan quvvati 150 MVt gacha bo‘lgan kichik GESlar qurilishini moliyalashtirish imkonini beradi. Ularda yiliga 520 Gigavatt soatdan ortiq ekologik toza elektr energiyasi ishlab chiqarilishi kutilmoqda.
13-iyun kuni Yevropa tiklanish va taraqqiyot banki O‘zbekiston bo‘ylab 110 ta sug‘orish nasos stansiyasini modernizatsiya qilish uchun 250 million dollargacha bo‘lgan suveren kredit ajratishi ma’lum qilingandi.
Izoh (0)