Eronning Isroilga uyushtirgan raketa hujumlari natijasida David Ben-Gurion universiteti oltita laboratoriyasi butunlay yo‘q qilindi, yana to‘qqiztasi jiddiy shikastlandi. Bu haqda Times of Israel nashri xabar bermoqda.
“19-iyun kuni Eron raketasi “Soroka” tibbiyot markazi hududiga tushishi oqibatida Ben-Gurion universitetining oltita ilmiy-tadqiqot laboratoriyasi vayron etildi, yana to‘qqiztasi shikastlandi”, deyiladi xabarda.
Ta’kidlanishicha, laboratoriyalarga berilgan zarbalar Isroilning tibbiyot va biologiya sohasidagi ko‘p yillik ilmiy loyihalarini deyarli yo‘qqa chiqargan.
Tibbiyot fanlari fakultetining o‘quv xonalari, amaliyot laboratoriyalari va anatomiya bo‘limi ham jiddiy zarar ko‘rgan. Bundan tashqari, universitetning asosiy hududidagi yana 30 ta turli binoga ham shikast yetgan.
Universitet rahbariyati hali ham zarar ko‘lamini aniqlamoqda: dastlabki baholarga ko‘ra, bu “o‘nlab, balki yuzlab million shekelni” tashkil etadi (joriy kurs bo‘yicha 10 million shekel 2,93 million AQSH dollariga teng).
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH Prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)