Isroil razvedkasi 13-iyun kuni Eronning yadro obyektlarini nishonga olish va amaldorlarini o‘ldirishdan oldin eronlik generallarga tahdid qilgani aniqlandi. Bu haqda tahdidli audioga tayanib, Washington Post xabar berdi.
Isroil razvedkasida ishlovchi, fors tilida so‘zlashuvchi odamlar Eronning yuqori martabali amaldorlariga uyali telefon orqali qo‘ng‘iroq qilgan.
Ular amaldorlarni Eron oliy rahnamosi oyatulloh Ali Xomanaiy rejimini qo‘llab-quvvatlashni to‘xtatmasa, o‘lishlari haqida ogohlantirgan, deydi maxfiy operatsiyalarni muhokama qilish uchun anonimlik sharti bilan gapirgan uch kishi.
Yahudiy razvedkasi hokimiyatdagi 20 dan ortiq eronlikka qo‘ng‘iroq qilgani aytilmoqda. The Washington Post nashri shunday qo‘ng‘iroqlardan birining audioyozuvini qo‘lga kiritgan. Unda noma’lum razvedka xodimi eronlik generalni uni va oilasini o‘ldirish bilan tahdid qilgan.
Sizga hozir maslahat berishim mumkin: xotiningiz va farzandingiz bilan qochib ketish uchun 12 soat vaqtingiz bor. Aks holda, hoziroq bizning ro‘yxatimizga tushasiz, keyingi nishonimiz bo‘lasiz. Sizni, oilangizni, bolalaringizni, hammani tuproq bilan ko‘mib tashlaymiz. Biz sizga bo‘yin tomiringizdan ham yaqinroqmiz. Buni miyangizga quying, degan ovozi o‘zgartirilgan razvedka xodimi.
Hali ham tirik deb taxmin qilinayotgan eronlik mazkur generalning kimligi oshkor qilinmagan. Qo‘ng‘iroq paytida uning ovozi o‘chirib qo‘yilgan.
Suhbat boshida qo‘ng‘iroq qilgan shaxs o‘zini “Salamiy, Bog‘eriy va Shamxoniyni do‘zaxga jo‘natgan davlatdanman” deb tanishtirgan. Bu so‘zlar orqali u Isroil tomonidan harbiy kampaniya boshlanishida o‘ldirilgan Eronning uch nafar yuqori lavozimli rasmiysiga ishora qilgan:
- Husayn Salamiy — Eron Islom inqilobi qo‘riqchilari korpusi boshlig‘i,
- General Muhammad Bog‘eriy — Eron harbiy kuchlari rahbari,
- Ali Shamxoniy — Eron oliy rahnamosi oyatulloh Ali Xomanaiy maslahatchisi.
Maqsad Eron rejimini beqarorlashtirish, o‘ldirilgan rahbarlar o‘rnini egallashi mumkin bo‘lgan ikkinchi va uchinchi darajali amaldorlarni tahdid ostiga olish bo‘lgan, deydi WP nashri.
Razvedka operatsiyasi doirasida Isroil agentlari va qurollari yashirin tarzda Eronga joylashtirilgan. Harbiy rahbarlardan tashqari, Isroil Erondagi bir qancha yetakchi yadro olimlarini ham yo‘q qilgandi.
Izoh (0)