Siyosatchi Aleksey Navalniy G‘arb mamlakatlari va xalqaro IT-korporatsiyalarni Kremlning harbiy propagandasiga qarshi axborot frontini tuzishga chaqirdi. Pokrovsk koloniyasida jazoni o‘tayotgan rossiyalik muxolifatchining murojaati uning Twitter’dagi sahifasiga joylashtirilgan.
“Ukrainaliklarni o‘ldirish uchun Putinga Rossiya ichkarisida ko‘mak kerak bo‘ladi. Anglab yetish zarur bo‘lgan birinchi jihat Rossiyada Ukrainadagi urushni 75 foizga qo‘llab-quvvatlash yo‘qligi. Bu Kremlning yolg‘oni. Rossiyada ortda qolgan bir yarim oy davomida barcha mustaqil OAV yopildi yoki bloklandi, hatto ancha ehtiyotkor nashrlar ham taqiqqa uchradi. Agar mamlakat ichida ko‘pchilik Ukraina bilan urushni qo‘llab-quvvatlaganida bu kabi bloklashlar kuzatilarmidi?”, – deb yozgan Navalniy.
Senzura va davlat propagandasi tufayli rossiyaliklarning aksar qismida Ukrainadagi urush haqida noto‘g‘ri tushuncha hamda axborot paydo qilinmoqda, ammo garchi ijtimoiy tarmoqlar blokirovka qilinganiga qaramay Rossiyadagi voyaga yetgan 85 foiz odamlar har kuni Meta (Facebook, Instagram, WhatsApp) va Google (YouTube) servislaridan foydalanmoqda, deyiladi siyosatchining tvitida.
Navalniy ijtimoiy tarmoqlarda rossiyalik foydalanuvchilar uchun urushga qarshi keng qamrovli kampaniyani boshlash kerak deb hisoblamoqda.
Bizga reklama kerak. Juda ko‘p reklama zarur. Urushga qarshi ulkan milliy kampaniya reklamalar majmuidan boshlanadi. Reklamalardagi kuniga 200 million ko‘rishlar har bir rossiyalik uchun ikki martadan ko‘rsatilganini anglatadi. Storizlar, postlar va prerollar ko‘payishi lozim. Rossiya bo‘ylab shaharlar-u, qishloqlarda har bir telefon hamda planshetda axborot berilishi muhim.Siyosatchi AQSH prezidenti Jo Bayden, Buyuk Britaniya bosh vaziri Boris Jonson, Yevroittifoq vakillari Ursula fon der Lyayen va Jozep Borrelni ijtimoiy tarmoqlarda reklama xarid qilishga, bu orqali rossiyaliklarga Ukrainadagi urush haqida haqiqatni aytishga chaqirdi.
Shuningdek, u harbiy senzura vaqtida mustaqil OAVga yordam ko‘rsatish zarurligini qayd etdi. Meduza, “Proyekt”, The Insider, “Mediazona”, “Vajniye istorii”, BBC Rus xizmati, Deutsche Welle, “Amerika ovozi” rus xizmati shular jumlasidan.
Bu xuddi saylovlardagi kabi katta milliy reklama kampaniyasiga aylanishi kerak. Bizning nomzod “Tinchlik” Putin tomonidan nomzodi ilgari surilgan “Urush”ga qarshi turadi. Tinchlik g‘alaba qozonishi shart. Bundan boshqasini tasavvur ham qila olmaymiz.Aleksey Navalniy
Izoh (0)