Sterlitamak shahrida O‘zbekiston fuqarosi rossiyaliklarning “Davlat xizmatlari” portalidagi akkauntlarini buzib kirib, o‘ndan ortiq muhojirni ro‘yxatdan o‘tkazish ishi bo‘yicha qo‘lga olindi. Bu haqda “Baza” Telegram kanali xabar qilmoqda.
Manba ma’lumotlariga ko‘ra, o‘zbekistonlik Azamatjon R. ismli shaxsga nisbatan chet el fuqarolarini soxta ro‘yxatga olish moddasi bo‘yicha jinoiy ish qo‘zg‘atilgan. Unga nisbatan uy qamog‘iga ehtiyot chorasi qo‘llanilgan.
Ta’kidlanishicha, erkak ro‘yxatdan o‘tishda yordam berish evaziga vatandoshlaridan pul olgan. Buning uchun u “Davlat xizmatlari” portalini buzib kirib, akkaunt va uy egasi hech narsadan shubhalanmaguncha, uning nomiga muhojirni ro‘yxatga olgan. Jami u o‘ndan ortiq chet ellikni qonuniylashtirish yo‘li bilan ro‘yxatdan o‘tkazishga erishgan.
Azamatjon Rossiyadan tashqarida bo‘lganida huquq-tartibot idoralari e’tiboriga tushgan. Biroq u yaqinda Boshqirdistonga qaytib kelgan va qo‘lga olinishi mumkinligini sezib, Minskka qochmoqchi bo‘lgan, ammo bunga ulgurmagan. Qo‘lga olingan shaxs Ufa shahri huquq-tartibot organlariga olib ketilgan.
Erkakka nisbatan chet el fuqarolarini soxta ro‘yxatga olish moddasi (Rossiya Federatsiyasi Jinoyat kodeksining 322.3-moddasi) bo‘yicha ish qo‘zg‘atilgan. Shaharning Kirov tuman sudi uni uy qamog‘iga jo‘natgan, ammo tergovchilar ehtiyot chorasini o‘zgartirib, Azamatjonni tergov izolyatoriga jo‘natishga urinmoqda.
Izoh (0)