Niderlandiyalik kiberxavfsizlik bo‘yicha mutaxassis, GDI Foundation notijorat tashkiloti hamasoschisi Viktor Gevers AQSh prezidenti Donald Trampning parolini taxmin qilib topib, uning Twitter’iga kira olganini ma’lum qildi, deb yozadi Meduza. Parol maga2020! — Trampning saylovoldi shiori — Make America great again iborasining qisqartmasi bo‘lib chiqdi.
Gevers Niderlandiyaning de Volkskrant gazetasiga bergan intervyusida parolni 16-oktabr kuni besh marta urinishda topganini aytdi. “To‘rt marta muvaffaqiyatsiz urinishdan keyin meni bloklab qo‘yishlarini hech bo‘lmaganda, mendan qo‘shimcha ma’lumot so‘rashlarini kutgandim”, — deydi ekspert. Uning so‘zlariga ko‘ra, Trampning akkaunti ikki faktorli autentifikatsiya bilan himoyalanmagan, bu esa unga akkauntga kirish imkoniyatini bergan.
Viktor Gevers Amerika prezidenti Twitter’iga hech narsa yozib o‘tirmadi, ammo akkauntga kira olganini isbotlash uchun skrinshotlar oldi. Odobli xaker sifatida Gevers AQSh prezidentiga xat yozib, uzunroq parol o‘ylab topishni va ikki faktorli autentifikatsiyani yoqib qo‘yishni taklif qildi. Shuningdek, AQShning kiberxavfsizlik bo‘yicha agentligi, MRB, FQB, Oq uy, Trampning saylovoldi shtabiga va Twitter ma’muriyatiga murojaat qildi.
Ertasi kuni Gevers Trampning akkauntida ikki faktorli autentifikatsiya yoqilganini sezdi. Yana ikki kundan keyin u bilan AQSh Maxfiy xizmati bog‘landi, unga Gevers o‘zida bor ma’lumotni yubordi. Shundan keyin Trampning Twitter’idagi parol o‘zgartirildi.
Twitter kompaniyasi Viktor Gevers haqiqatan ham Amerika prezidenti akkauntiga kirganini tasdiqlovchi hech qanday dalil topmaganini ma’lum qildi. Oq uyda esa Geversning gaplarini — “mutlaqo yolg‘on” deb atashdi.
Viktor Gevers 2016-yilda ham yana ikki xaker bilan birga Trampning akkauntiga kirgan, bunda 2012-yilda Linkedin xakerlar hujumiga uchraganidan keyin Trampning tarqalib ketgan parolidan foydalanishgan edi. Bu Trampning The Apprentice (“Shogird”) realiti-shousidagi mashhur iborasiga ishora qiluvchi yourefired (“Ishdan bo‘shatildingiz”) paroli edi.
Viktor Gevers kompyuter xavfsizligi bilan bog‘liq jiddiy holatlar haqida ko‘p marta ma’lum qilgan. Masalan, 2018-yilda u internetda Xitoy politsiyasi pudratchisining ma’lumotlar bazasini topgan, u millionlab uyg‘urlar kuzatilgani haqidagi ma’lumotlardan iborat edi.
Avvalroq Rossiya xakerlari AQShdagi federal va mahalliy kompyuter tarmoqlariga kirish imkoniyatiga ega bo‘lib, endi Trampga yordam berish uchun AQShdagi saylovlarga aralashmoqchi ekanligi ma’lum qilingandi.
Izoh (0)