Ukrainaga gumanitar yordam yig‘ish va ukrainaliklarni urush zonasidan evakuatsiya qilishga yordam bergan rossiyalik faol 20-iyun kuni Moskva harbiy sudi tomonidan 22 yillik qamoq jazosiga hukm qilindi. Bu haqda Arab News xabar berdi.
Nadin Geysler nomi bilan tanilgan Nadejda Rossinskaya “Go‘zallar armiyasi” deb nomlangan guruhni boshqargan. U 2022—2023-yillarda Ukrainaning Rossiya nazorati ostidagi qismlarida 25 mingga yaqin odamga yordam bergan.
Rasmiylar Geyslerni 2024-yil fevral oyida hibsga olgan. Keyinchalik u Instagram’da Ukrainaning “Azov” batalyoniga xayriya qilishga chaqirgan posti uchun davlatga xiyonat va terrorchilik faoliyatiga yordam berishda ayblagan. Geysler buni rad etgan va uning advokati u post muallifi emasligini bildirgan.
Prokurorlar 20 yoshni qarshilagan Geysler uchun 27 yil so‘ragandi. “Mediazona” nashrining yozishicha, u suddan o‘zini 27 yil va bir kunga qamoqqa olishni so‘ragan. Shunda uning qamoq muddati 2023-yilda urush tarafdori bo‘lgan blogerni o‘ldirgan bombani yetkazib bergani uchun qamoqqa tashlangan rossiyalik Darya Trepovaning qamoq muddatidan oshib ketadi. Trepovaga 2024-yili chiqarilgan hukm zamonaviy Rossiya tarixidagi eng uzoq muddatli hukm bo‘lgandi.
Rossiyada 3 yil oldin Ukrainada keng ko‘lamli urush boshlanganidan beri terrorizm, josuslik va xorijiy davlat bilan hamkorlik uchun jinoiy javobgarlik keskin oshgan. Rossiyaning “Pervy Otdel” advokatlar uyushmasi 2024-yilda bunday jinoyatlar uchun 359 kishi sudlanganini aytgan.
Izoh (0)