AQShning Colonial Pipeline quvur liniyasi kompaniyasi 7-may kungi xakerlar hujumidan so‘ng o‘z faoliyatini qayta tikladi. Bu haqda kompaniya Twitter’iga tayanib, Meduza xabar berdi.
https://twitter.com/Colpipe/status/1392943295836340231
“Colonial Pipeline butun quvur tizimini qayta ishga tushirgani va o‘zi xizmat ko‘rsatadigan barcha bozorlarga mahsulot yetkazib berishni boshlagani haqida ma’lum qiladi”, — deyiladi kompaniya xabarida.
Bloomberg va The New York Times gazetalarining yozishicha, kompaniya quvur tizimini qayta tiklash uchun pul talab qilgan kiberhujumchilarga taxminan 75 bitkoin yoki 5 million dollar to‘lagan.
Federal qidiruv byurosi (FQB) ma’lumotlariga ko‘ra, Colonial Pipeline’ga qilingan hujum ortida DarkSide xakerlik guruhi turibdi, uning bazasi Sharqiy Yevropada bo‘lib, asli rossiyalik xakerlardan iborat. Ular kompaniyaning kompyuter tizimiga zararli dasturni kiritgan, natijada quvur faoliyati bir hafta davomida to‘xtab qoldi. AQSh prezidentining so‘zlariga ko‘ra, ushbu hujumga Rossiya hukumatining aloqasi bo‘lmasligi mumkin.
Colonial Pipeline quvur liniyasining uzunligi 8800 kilometrdan oshadi. AQSh Sharqiy sohiliga yetkaziladigan benzin, dizel yoqilg‘isi va boshqa neft mahsulotlarining 45 foizi shu quvur orqali o‘tadi. Kompaniyaga uyushtirilgan kiberhujum AQShning bir qator shtatlarida benzinga talab ortishiga sabab bo‘ldi.
Izoh (0)