Shimoliy koreyalik xakerlar koronavirusga qarshi vaksinaga oid ma’lumotlarni olish uchun Pfizer farmatsevtika kompaniyasining serverlariga kirishga urindi. Bu haqda Janubiy Koreya Milliy razvedka boshqarmasi (NIS) ma’lumotiga tayanib Yonhap xabar berdi.
Janubiy Koreya Milliy assambleya razvedka qo‘mitasining yopiq yig‘ilishida shimoliy koreyalik fuqarolar kiberhujumni amalga oshirishga uringani taxmin qilindi. Xakerlar ma’lumot olishga muvaffaq bo‘lganmi yoki yo‘qligi haqida axborotlar topilmagan.
Ma’lumot uchun, Germaniyaning BioNTech kompaniyasi bilan hamkorlikda koronavirusga qarshi vaksina ishlab chiqqan Amerikaning Pfizer kompaniyasi 2021-yilda ushbu dori sotuvidan 15 milliard dollar foyda olishi kutilmoqda. Vaksinani hisobga olmaganda, Pfizer 2021-yilda 44,4—46,4 milliard dollar atrofida foyda olishi mumkin. Kompaniyaning har bir aksiyasidan keladigan foyda 3,10 dollardan 3,20 dollargacha bo‘lishi bashorat qilinmoqda.
Avvalroq rossiyalik xakerlar AQSh Moliya vazirligi tizimiga hujum uyushtirgani haqida xabar berilgandi. Hujum ortida Cozy Bear (APT29 sifatida ham ma’lum) guruhi turgan. Guruh Rossiya maxsus xizmatlariga aloqador deb gumon qilinadi.
Undan avval mazkur guruh Buyuk Britaniya, AQSh va Kanada maxsus xizmatlari tomonidan COVID-19 vaksinasini ishlab chiqayotgan xalqaro tadqiqot markazlarining tarmoqlariga yashirincha kirib, bu boradagi axborotlarni o‘g‘irlashga uringanlikda ayblangan edi.
Shuningdek, niderlandiyalik xaker 2020-yil 16-oktabr kuni Donald Trampning parolini besh urinishda topib, uning Twitter’iga kirgani haqida xabar berilgan.
Izoh (0)