2025-yil oxirida Netflix AQSHning Filadelfiya va Dallas shaharlarida o‘zining ilk ko‘ngilochar majmualari Netflix House’ni ochadi. 2027-yilda ularga Las Vegasdagi uchinchi markaz ham qo‘shilishi kutilmoqda. Bu haqda kompaniya rasmiy saytida ma’lum qilindi.
Netflix House — bu har biri 9 ming kvadrat metrdan ortiq maydonga ega bo‘lgan yirik attraksion parki bo‘lib, bu yerda tashrif buyuruvchilar sevimli seriallarini tomosha qilish bilangina cheklanmaydi, balki ularning ichiga “sho‘ng‘ish” imkoniyatiga ega bo‘ladi. Majmualarda mashhur loyihalar, jumladan, “Juda g‘alati ishlar”, “Uenzdey”, “Kalmar o‘yini” va “Qindan chiqqan pichoqlar” syujetlari interaktiv formatda taqdim etiladi. Ular orasida kvestlar, VR-o‘yinlar va syujetli mini-golf ham mavjud.
Filadelfiyadagi Netflix House markazi King of Prussia nomli savdo markazida joylashadi. Dallasdagi majmua esa Galleria Dallas savdo markazida ish boshlaydi. Bu yerda tashrif buyuruvchilar “Juda g‘alati ishlar” uslubidagi missiyada, “Kalmar o‘yini”dagi omon qolish sinovlarida ishtirok etishlari mumkin. Shuningdek, o‘yin zonasi, teatrlar va turli interaktiv faoliyatlar ham yo‘lga qo‘yiladi.
Har ikkala markazda Netflix Bites nomli restoran ochiladi. Bu yerda Netflix serial va shoularidan ilhomlangan taomlar taqdim etiladi. Shuningdek, majmualarda maxsus do‘konlar bo‘lib, ularda turli tematik suvenirlar, kiyim-kechak va mahsulotlar doimiy yangilanib boradi.
Netflix marketing bo‘yicha direktori Marian Lining ta’kidlashicha, yangi format tomoshabinlarga sevimli film va seriallariga “qadam qo‘yib”, ularni jonli tarzda boshdan kechirish imkonini beradi.
Izoh (0)