AQSHning Texas va Kanzas shtatlari orasida 2017-yil oktyabrda kuzatilgan 829 kilometr uzunlikdagi chaqmoq uzunlik bo‘yicha yangi jahon rekordini o‘rnatdi. Bu haqda BMT huzuridagi Jahon meteorologiya tashkiloti (JMT) bayonotida ma’lum qilindi.
“JMT eng uzun chaqmoq bo‘yicha yangi jahon rekordini qayd etdi. AQShdagi mashhur bo‘ronlar hududida hayratlanarli 829 kilometr (515 milya) uzunlikdagi chaqmoq kuzatildi. Bu ulkan chaqmoq 2017-yil oktyabrda kuchli momaqaldiroq paytida sodir bo‘lib, sharqiy Texasdan Kanzas-Sitigacha bo‘lgan hududni qamrab olgan. Bu masofa Yevropadagi Parij bilan Venetsiya orasidagi masofaga teng. Bunday masofani bosib o‘tish uchun avtomobilga taxminan sakkiz-to‘qqiz soat, tijorat samolyotiga esa kamida 90 daqiqa kerak bo‘ladi”, deyiladi hujjatda.
Shuningdek, global ekstremal hodisalar bo‘yicha rasmiy ma’lumotlarni yurituvchi JMTning ob-havo va iqlim ekstremal hodisalari qo‘mitasi eng so‘nggi sun’iy yo‘ldosh texnologiyalaridan foydalanib, bu yangi rekordni tasdiqlagan.
Ushbu chaqmoq avvalgi rekorddan 61 kilometrga uzunroq. Oldingi rekord 2020-yil 29-aprelda qayd etilgan bo‘lib, o‘shanda chaqmoq AQSH janubidagi bir nechta hududlardan o‘tib, 768 kilometr masofani bosib o‘tgan edi.
“Bu yangi rekord tabiiy ofatning aql bovar qilmas kuchini yaqqol ko‘rsatadi. Bundan tashqari, JMTning bunday rekord singari ekstremal atrof-muhit hodisalarini baholashi, bu kabi hodisalarni kuzatish, hujjatlashtirish va baholashda sezilarli ilmiy yutuqlarga erishilganidan dalolat beradi. Ehtimol, bundan-da jiddiyroq ekstremal hodisalar mavjud va vaqt o‘tishi bilan chaqmoqlarning boshqa yuqori sifatli o‘lchovlari to‘planib borgani sari biz ularni kuzatish imkoniga ega bo‘lamiz”, deb ta’kidlaydi hujjatda JMTning ob-havo va ekstremal iqlim hodisalari bo‘yicha ma’ruzachisi Rendall Chervenya.
Izoh (0)