2025 йил охирида Netflix АҚШнинг Филаделфия ва Даллас шаҳарларида ўзининг илк кўнгилочар мажмуалари Netflix House’ни очади. 2027 йилда уларга Лас Вегасдаги учинчи марказ ҳам қўшилиши кутилмоқда. Бу ҳақда компания расмий сайтида маълум қилинди.
Netflix House — бу ҳар бири 9 минг квадрат метрдан ортиқ майдонга эга бўлган йирик аттракцион парки бўлиб, бу ерда ташриф буюрувчилар севимли сериалларини томоша қилиш билангина чекланмайди, балки уларнинг ичига “шўнғиш” имкониятига эга бўлади. Мажмуаларда машҳур лойиҳалар, жумладан, “Жуда ғалати ишлар”, “Уэнздей”, “Калмар ўйини” ва “Қиндан чиққан пичоқлар” сюжетлари интерактив форматда тақдим этилади. Улар орасида квестлар, VR-ўйинлар ва сюжетли мини-голф ҳам мавжуд.
Филаделфиядаги Netflix House маркази King of Prussia номли савдо марказида жойлашади. Далласдаги мажмуа эса Galleria Dallas савдо марказида иш бошлайди. Бу ерда ташриф буюрувчилар “Жуда ғалати ишлар” услубидаги миссияда, “Калмар ўйини”даги омон қолиш синовларида иштирок этишлари мумкин. Шунингдек, ўйин зонаси, театрлар ва турли интерактив фаолиятлар ҳам йўлга қўйилади.
Ҳар иккала марказда Netflix Bites номли ресторан очилади. Бу ерда Netflix сериал ва шоуларидан илҳомланган таомлар тақдим этилади. Шунингдек, мажмуаларда махсус дўконлар бўлиб, уларда турли тематик сувенирлар, кийим-кечак ва маҳсулотлар доимий янгиланиб боради.
Netflix маркетинг бўйича директори Мариан Лининг таъкидлашича, янги формат томошабинларга севимли фильм ва сериалларига “қадам қўйиб”, уларни жонли тарзда бошдан кечириш имконини беради.
Изоҳ (0)