Internetda Rossiya va Saudiya Arabistoniga qarshi qaratilgan josuslik virusi paydo bo‘ldi. Bu haqda Financial Times gazetasiga asoslanib, “Kun.uz” xabar bermoqda.
Antivirus dasturlarini ishlab chiqarish bo‘yicha jahondagi yetakchi shirkatlardan biri, Amerikaning Symantec kompaniyasi Regin virusini hozirgi kunda ma’lum bo‘lgan josuslik viruslari orasida eng mukammali deb atadi.
Symantec yangi Regin virusini Eron yadroviy dasturi rivojini sezilarli sekinlashtirgan Stuxnet virusi bilan taqqoslagan. Biroq, Symantec mutaxassislarining fikricha, Regin virusi Stuxnet’dan-da mukammalroq bo‘lishi mumkin.
“Stuxnet’ni yodga soluvchi bu virus axborot to‘plash bilan shug‘ullanadi, uni jahondagi eng zararli virus deb atashmoqda, u Rossiya va Saudiya Arabistonining telekommunikatsiya kompaniyalarini nishonga olgan”», – deb yozadi Financial Times.
Gazetaning qayd etishicha, ushbu virus G‘arb mamlakatlaridan birining maxsus xizmatlari tomonidan ishlab chiqilgan va boshqarilayotgan bo‘lishi mumkin. “Yangi virus 2010-yili Eron yadroviy dasturini yo‘qqa chiqarish uchun AQSh va Isroil hukumatiga ishlovchi xakerlar tomonidan tayyorlangan Stuxnet virusi qaysidir jihatlari bo‘yicha kuchliroq”, – deyiladi maqolada.
Symantec’ning qayd etishicha, Regin virusi asosan Rossiya, Saudiya Arabistoni, shuningdek, Meksika, Irlandiya va Erondagi aloqa kompaniyalari va internet-provayderlar faoliyatiga ta’sir qilgan.
Virus korporativ tizimlarni qay yo‘sinda buzishini mutaxassislar hozircha aniqlaganicha yo‘q, biroq, ularning fikricha, Regin jahonning yetakchi aloqa operatorlariga ulangan mobil telefonlarni eshitib borish, shuningdek, Microsoft kompaniyasi serverlaridagi elektron pochtani kuzatib borish imkonini beradi.
Izoh (0)